zomi aw lung lau ken!

ARTICLES
BLUE GREY RED

Warning: Attempt to modify property of non-object in /home/tongsan/public_html/archive/components/com_jomcomment/mambots.php on line 142

Warning: Attempt to modify property of non-object in /home/tongsan/public_html/archive/components/com_jomcomment/mambots.php on line 142

Warning: Attempt to modify property of non-object in /home/tongsan/public_html/archive/components/com_jomcomment/mambots.php on line 142

Warning: Attempt to modify property of non-object in /home/tongsan/public_html/archive/components/com_jomcomment/mambots.php on line 142

Articles

Phoenix pan Tulsa Khualzin Tuahphatna

PDFPrintE-mail

Last Updated on Wednesday, 18 March 2015 00:43 Written by Tongsan Admin Wednesday, 18 March 2015 00:35

IMG 20141225 185259America gam ah Zomi a tampenna khua Tulsa pen America gam ka tun ciangin pailoh/hawhloh a phamawh dinga ka ngaihsut ahi hi. Ahih hangin ka hawh theihnadingin vai a om kei leh ka mawk pai thei tuan kei hi. Tulsa ah ka meltheih khat leh nih a om tei hangin ka omna Phoenix panin vanleng tawh nai 5 sung bang paina mun tua khua ah meltheih kawma zin ding zong ol lo veve hi. Sia David Kham in US a om laitak November 2014 kha tawp lamin Tulsa ah kituah ni, kimu nuam hang hong cih cingin ut mahmah napi’n ka pai zo kei hi. January 9, 2015 nitakin Pu Go Sawm Khup, President, Zomi Innkuan, USA (ZIUSA) in phone tawh hong hopih a, February 20 Zomi Nam Ni Tulsa ah hong zang in ci-in hong cial ciangin ka lunggulh giugiau Zomite tamna mun phak theihna ding Pasian in lampi hong bawlsak hitah ci-in ka ngaihsun hi. Tua khit ciangin Zomi Innkuan Oklahoma (ZIOK) President Pa T. Sawm Lian tawh kizomin kivaihawm toto pah hi. Hih thului pen Zomi Nam Ni zang dingin Phoenix pan Tulsa ka khualzinna leh ka khualzin sunga ka tuah thuphate ciamtehna dana ka gelh ahi hi.

Dallas leh Fortworth Ah:

February 14 nitaklamin Phoenix panin American Airlines tawh Texas state a om Fortworth ka pai hi. Fortworth a om Zomi Mission Church pawlpi pan Sia Khaipu leh Pa Thawn in airport ah ong dawn uh hi. Tua nitakin Zomi Mission Church home cell kikhopna ah thugenna ka nei hi. Nitak nai 9:30 pawlin ka giahna ding motel ah Dongno leh Lam Thang in ong kha uh a, zan nai khat dong nuamtakin ka holim uh hi. Shillong ah research ka bawl lai-in Dongno zong sangkah in hong om ahih manin tua panin a kitheisa ka hi uh hi. India ah high school ka kahpih lawm Kham Khan Chin Ngaihte in Fortworth ah Lai Siangtho a sin laitak hi-a, amah tawh kimu nuam mahmah napi’n hun kingahlo ahih manin phone bek tawh ka kiho uh hi.

A zingciang, February 15, zingsang lamin Fortworth Zomi Innkuan makaite in ann hong nekpih hi. Makaipi Pa Lian Tuang, Tg Tung Thang leh Tg Lam Thang tawh holimna hun nuam ka ngah uh hi. Pa Lian Tuangte lawmta teng tawh ka holimna uh panin Cikha pen border town khat suak sak zo le’ng cih a lunggulhna uh thupi kasa hi. Khantohna a hatna dingin khuaneu ah I kikhen sangin khua lian bawlin tengkhawm le’ng a meetna tampi om takpi hi. Mizogam ah khantohna a manlang theihna a hang khat pen MNF leh kumpi a kido hun (1965-66) akipan India kumpi in village grouping nakpitakin na bawl ahih manin a ciilin Mizote adingin a haksat hangin a nung ciangin a thahatna/khantohna kipatna uh na suak hi. Lamka gam buaina hangin singtang/khamtung panin mitampitak in Lamka khuapi zuanin milip mahmah khang ahih manin tu-in Lamka ah khantohna hat mahmah hi. Mai lamah India leh Burma kikawmna hong hoih tetek leh border town I neih ding hong thupi mahmah ding hi. India lam panin Behiang khang dinga, Kawlgam lam ah zong tua bang khat I kisam ding hi. Moreh leh Tamu zong tua bang hi.

Zing ann nek khit ciangin Dallas pan hong dawn dinga hong pai Pa Daniel Mangpu tawh Dallas lam ka pai uh hi. Dallas leh Fortworth kikal pen mawtaw tawh nai 1 sung paina hi. Pa Daniel Mangpu pen Tedim a Dr Thuam Khan Thang I tapa ahi hi. Amau inn ah tawlngak khit ciangin nitaklam nai 2:00 PM in amau pawlpi Zomi Community Church ah kikhawmin thugenna ka nei hi. Hih pawlpi ah tulaitak Pastor a sem pen Sia Suang Khen Pau (Sia Paubawi). Kikhop man ciangin Pa Daniel Mangpu inn ah holimin nitak ann ka nekhawm uh hi. Sia Paubawi kiangah ka giak a, amah tawh hun nuamtak ka ngah theih manun ka lungdam hi. A diakin Sia Thang Ngaih Lian (Sia Lian) in a room/khan ah hong giaksak ahih manin ka nuam hi. Sia Lian-te innkuan pen kei tunma diakin Kawlgam Tahan ah na ciah uh hi. Dallas ka om sungin Pa Daniel Mangpu, Pa Piang, Pa Dal Khan Mang leh Nu Muang-te innkuan in ann limtak hong nekpih manun ka lungdam hi. February 17 nitaklamin Sia Paubawi in Airport tan hong kha-in American Airlines mah tawh Tulsa lam ka zuan hi.

Tulsa, America Zomite Khuapi:

Dallas leh Tulsa kikal vanleng tawh nai khat lian ki-leeng hi. Tulsa pen Oklahoma state sungah om hi. February 17, 2015 nai 5:20PM in Tulsa International Airport ka tun ciangin ZIOK makaite, Mualnuam khua kipawlna makaite leh ZBCM siate mi 13 in ong na dawn uh hi. Dr Pum Khan Pau, Chief Guest, Zomi National Day 2015 cih a kigelhna name tag (I-D) khat leh paak khat hong piapah uh hi. Mi tampi in hong ngak cih ka gal muh ciangin Oh! kei kua himawk ka hiam hih zah a hong kidawnna dingin cih ka ngaihsun hi. Ka mi ka sate itna hong ngahsak Pasian ahihna ka phawk tetek hi. Airport sungah man kizaih ziahziah in tua pan ka pusuah lian uh leh vuk/guah hong zu ziahziah mawk hi. Tulsa pen US gam bupa huih nam tuamtuamte kituahna ahih manin khuahun kikhel pakpak thei hi kici hi. Ka zin tunna ding U Ngin Khan Lang (Pa Langno, Zuasiam ciin zong a kithei) inn ah ka kinga hi. Topa tungah lungdam kohna nei-in hong dawnte pawlkhat ong zuisuakte tawh ka holim uh hi.

ZIOK makaite in hotel ah tungsak dinga a geel laitak ama inn ngiat ah hong zindo nuam a hong kipiakhia Pu Langno leh Pi Cingtawng-te nupa thupi kasa mahmah hi. Pu Langno pen Mualnuam khua pan hi-a, kei zong ka pu ka pate Mualnuam pan ahih manin khuapihte omna mun buangah mun dangah tung theilo ding hi, ci-in ama inn ah hong tun sak ngiat pen thupi kasa hi. Amau innkuan Pasian in thupha pia ahih manin tanu thum leh tapa thum nei uh a, a tate laisiam mahmah in America President Award nangawn ngah uh hi. A diakin tanu upa pen Lia Dim Sian Mang @Mangnu bang ZIUSA tangmi in UN Youth Forum ah na kihel ngei hi. Tanu neupen Deihnu leh tapa neu pen Mungmung bang in hong maingapin hong ngai mahmah uh ahih manin nuam kasa hi. Gualnam beh ahih manun ka pute na hi sawnsawn a, ka angtang diak hi.

February 18, ni-in Sia Paul Zam Thang sanggam nu Nu Niang Ngaih Vung @Vungno galin Pu Langno tawh kava pai uh hi. Nidang pek panin Sia Paul’ pa Pu Awn Thang leh kei pa bang Lamka ah na kithuahin a kikawm mahmah a hi uh hi. February 19 zinglamin funeral service ah ZIOK Vice president Pa Khai tawh ka pai uh hi. Hall dim phitphet in Zomite paikhawm ka muh ciangin mi tam kasa mahmah hi; ahih hang tua pen Tulsa Zomite lak pan sawm ah thum zong hinailo ding hihtuak lai hi.

Rev Dr Chin Do Kham Han ah Hawhna:

February 18 nitak lamin Pa T. Sawm Lian-te nupa in nitak ann ne dingin hong vakpih kawmun Rev Dr Chin Do Kham han ah ka pai uh hi. Kum October 13, 2013 in Siapa in hong nusiat ciangin leitung bup Zomite lakah tua zaha a om ngeilo dahna leh thawmhauna lianpi hong tung hi. Tua thu ka zak masakna pen meileng sung pan hi. Delhi ah holiday zang dingin ka innkuanpihte tawh Kolkata airport zuanin ka nasepna Visva Bharati University, Santiniketan panin ka pai laitakun Shillong pan ka sungnu in ka zi kiangah phone tawh Sia Kham sihna thu hong ko hi. Um theilo, um ngamlo napi’n dip sung ong kilok pah keei hi. Meileng sung mah pan internet hongin ka et ciangin Facebook ah tua thu kisuah ka muh ciangin a hitakpi mah hi ding hitah ci-in ka khualzin uh a nop nawn het kei hi.

Mitampi in Sia Do Kham ci-a I sap, siapa pen Pasian in Zomite lakah sangpitakin a laptoh khat hi-a, leitung bup Zomite lakah a muibun mahmah makai khat ahih manin ama damloh thu zakhollopi-a hong nusiat I zak vat pen thangah huai hetlo hi. Amah tawh ka kimuh ngeiloh hangin nidangin email tawh nihvei khawng ka kiho ngei tei uh hi. Tua leh nidang gamdang a paima-in Lamka a zin ciangin ka pano Do Khan Thang Lanva) te inn ah zintung thei hi, cih ciang pen ka theihna hi. Ahih hangin Pasian in leitung bup Zomite lakah a lapsang mahmah laitakin nuntakna hu tawp a san mawk pen laigil ah na kasa mahmah hi. Delhi ka tun ciangin Vikaspuri ah ZCF makaihna tawh galna hun kizang ding hi cih ka zak ciangin ka lawmpa Dr L. Lam Khan Piang (JNU) tawh ka pai uh hi. Tua hun zatna ah ko lawmta zong thugenna tomna hong kipia ahih manin Siapa itna leh phawkna thu ka gen uh hi. Delhi ka om sung mahin Siapa luanghawm tawh kisai thu tangkona leh programme kizatnate nisimin internet panin ka en hi. Kuaman hong phawkpih loh hangin ka nupa-un ka thuak mahmah uh hi.

Tua ahih manin Tulsa ah Siapa haan ka mit mahmah tawh mu-in a mun ah ka paitheih ciangin dahna khitui hong kia kik hi. Ong paisan baih si teh, na maban tampi omlai hiven maw, ong zahtak mahmah ing ei Sia Kham ci-in a haan phungah lungsim kahtam ka lo hi. Zomi sungah Sia Do Kham’ kivakna bang lian a nei ding ka theihpak loh manin ama hong nusiatna in supna lianpi hi, ci-in ka ngaihsun hi. Nungta lai hi leh Zomite maban kalsuanna tampi hong makaih thei lai ding hiven cih khawng I ngaihsut ciangin I dah mahmah hi; ahih hangin Sia Kham om loh ciangin ama mun awng (void) a hudim zo dingin Pasian in kitangsapna bangin hong vaihawm ding hi cih zong ka um hi.

Zomi National Day Ah Chief Guest:

February 20 nitak nai 7:00PM pan nai 9:30PM dong Marriot Hotel ah 67 veina Zomi National Day kizang hi. Hall lianpi sungah a dim phitphetin kitu demdam hi. Hun kipatma-in Sangi leh Kimpi-te unau in hong nohset/cibai kawmin puanlaisan tawh a kizem T-Shirt hoih mahmah khat hong pia uh hi. Amau unau pen Pasian la tawh Kawlgam-Vaigam a lok gawp khit uh ciangin Pasian in America ah puakin tulaitakin Tulsa khuapi ah om uh hi.

Hun kipat ding ciangin ka tutna lang tuakah tangval thagol nih puanvom tawh kizem, wireless phone tawh kizom earphone a bil ah kithuah, mit limlang vom bulh tuak hong tu hi. Puannuai thau a pua uh tam bel thei keng. Amau pen kei hong cing ding ahi hi. Ka ngaihsutna ah guai! lawmte’n kei pen inn lama ZRO makaipi Sia Pau hong sa a hong cing keei uh hiam? cih hong suak dektak hi. A ciil teng ka om nuamlo dek phial mawk hi. Kuama cin kul lo-a suakta a kisa mahmah khat tua nitakin hong kicin keei ciangin ka patau leh lam dektak hi. Puanvom silhte nih in “Tui na duh hiam, na zun a suak hiam, na kisap a om leh hong gen in”, ci-in amau pen a pualama a lawmte uh tawh kiho kawmkawm uh hi. A lang khat ah lah, kalaisai! Ni Khat Kumpi a cih bangin kei zong nai 2 khawng president a suak pak lah ka bang phial mawk a! ka ci hi. A taktakin lawmte’n kei hong theikhial hilo-in hong tawisang lua na hi gige ahih manin ZIOK vaihawmna leh ngaihsutna zahtakhuai kasa hi.

Hunuk nungak thumte (Ruth, Suih Lun leh Nu Toih) in hun kipanta ding hi hang, a cih lian teh ZIOK President Pu Sawm Lian stage ah kahto in A 67 Veina Zomi National Day ka hong hi cih pulana nei-a, tua tawh kizomin Thawn Kham’ khui pan Zogam lapi Zogam, Zomi puak ziahziah in kihong hi. Tua la sak sungin mipi tanglo-in kiding khipkhep hi. Tua nitaka ka gei ah puanvom, mitlimlang vom a silhte kikal ah Zogam lapi kisak sung zahtakna tawh ka din laitakin ka lungtang tawng ah ka minam ka itna hong thak suakin hong suk khak dan kigen theilo hi. La leh laam tuamtuamte in mit taisak hi. Zopuan tawh kizem siamte pahtawina kipia-a, Jenks High School sangsiate zong lungdam lahna Zopuan kipia hi. Pawlpi tuamtuam pan pastor-te hong kihel banah vdo coverage nasiatakin kibawlin live in kikhah hi. Programme sungah thugenna nei nih bek om hi. Amasa in Lia Dim Sian Mang (Mangnu) in UN Khangno khawmpi a paina report pia hi.

Tulsa Zomi National Day ah minute 30 sung ka thugenna ah ka lim gen pen nam nih in kikhen thei hi. Khatna ah February 20, 1948 a Falam ah Chin Special Division gambup panin Zo minam tuamtuamte in lungsim khat tawh a kipawl theihna uh a kha (spirit) pen nidangin a om ngeilo thu ahih hangin tuani-a thupiang tawm zong hi tuanlo hi. Tuabanga kipawl khop theihna lungsim pen a beisa kum 50 val panin sut kik kul hi. Mi tampite in Zomi Nam Ni thu I gen ciangin lungsim kigawm theihna hang kan lo ahih manin ahihna taktak bun kha theilo hi. Nidangin Hausa-te thuneihna a kimu theilo ukna a nei khuasiam in a piak hi, ci-in I pu leh pate in ngaihsunin zahtak uh hi. Ahih hangin tua thuneihna British-te in a laksak ciangin khuasiam mun British-ten a luah suak hi. Tua hun akipan hausa/ukpi leh mipi kikal ah nawngkaina kipan hi. Hausa/ukipite deihlohna hi masa lo-in, amau tunga thunei British-te thuneihna nialna hizaw hi. Nihna ah, tuhun America gam a tung Zomite in I thupisak ding thute:

1. Nidangin biakna (Christianity) in a kikhethang I pu leh pate gawm hi. Ahih hangin tua hong gawmkhawm biakna pen kikhenna I suaksak hi. Tua hangin lungsim gamgi hong piang hi. Biakna gawmkhop ding a haksat hangin, biakna pua lamah I lungsim gawmkhwm thei hihang. America ah Zogam tual lungsim gamgi pua nawnlo-in biakna pen kigawm theihlohna suaksak nawn kei ni.

2. America thubullet (Constitution) ngaihsun khiapa Thomas Jefferson in Declaration of Independence sungah mihing khat I hih nak leh ei tawh a kikhen theilo a cih Right to Life, Liberty and the Pursuit of Happiness a koihna hang pen, Europe gamah kumpi leh biakna sungah suahtakna a om lohna pan suakta nuama America leitang thak ah a peem ahih man uh ahi hi. Tua ahih manin mihing nuntakna, suahtakna, leh nopsakna/lungdamna ding tawh kisai peuhmah ah suahtak ngiat ding a deihna uh ahi hi. Tua mah bangin a suaktalo gam Burma panin a America gam a tung Zomite in tua suahtaknate I zat siam ding hoih hi. America ah Zomite adingin a thupi masa pen in Education (lai pilna) hi. Hauhna sangin khanto zaw leh a meet tamzaw pen lai pilna hi. Khantohna a manlang na ding leh a kizop paisuak theihna dingin lai pilna kisam hi. Lai pilna lamah kidem ni.

3. Nidangin gamgi bek in hong khen’ Zomite ihi-a, tuhun in gamgi bek hilo, tuipite nangawnin hong khenta in leitung continent tampi ah I om ta hi. Tua ahih manin minam leh gam itna pen transborder nationalism panin transcontinental nationalism dong ah I neihzawh kisamta hi.

4. Zomite adingin unity in diversity thupi hi. Tua bang lungsim lian tawh I kalsuan theih ciangin minam picing ihihna kilang dinga, I khangto ding hi. I kibatlohnate kikhenna (diversity without fragmentation) suak lo-in, a kibangkim lopi mah kigawm (unity without uniformity) thei leng tua pen thahatna hi. Ei bek kicih nop tiltelna pen midang tawh kipawl theihlohna hi-a, tua in ei leh ei kipuaseh/tang dinna (self-isolation) hong suah ding lauhuai hi. Zomi Nam Ni spirit in Unity in Diversity hi.

ZBCM Pawlpi ah Hunzatna:

Tulsa ah nipini dong tam suak ka hih manin Zomi Baptist Church of Myanmar (ZBCM) pawlpi in nipini hun amau biakinn ah hong piak manin ka lungdam mahmah hi. February 22 in ZBCM senior pastor Rev. Kapmang in a seppih sia dang li tawh Panera restaurant ah kiallap (breakfast) hong nekpih a, holimna hun nuam ka ngah uh hi. Nai 1:00PM in biakinn ah kikhopna kinei hi. From Refugee to Ruler thulu zangin thugenna ka nei hi. Pawlpi picing mahmah uh a, sia zong 5 tak om hi. A biakinn uh zong nasia mahmah hi. Siate lak pan khat Sia Hau Mung in khangno leh media lam sai-in biakpiakna bang zong online in khah pah hi. Kiva mahmah hi. Sia Kapmang zong ka zi adingin a pute ahih manin amau inn ngiat ka sik khak ka lungdam hi. Tulsa ka tun in airport ah amah zong a dawnin hong pai ahih manin thupi hi. Sia Kapmang ka theihna pen Taangko khui bawl uh pan hi. A lasakte uh hoih sa-in ka uk mahmah hi. 1990 (?) kum hiam khat in Lamka hong pai-in Sia Tua Mung tawh New Lamka CBA biakinn ah a lasak uh ka thei lai hi.

Deihsakna leh Hamphatnate:

February 18 zingsangin Pu Langno leh ZIUSA lutangpi Pu Go Sawm Khup tawh Kala ann sai ah zing ann ka nekhawm uh hi. Pu Khup tawh ka kimuh patna hi-a, ka angtang hi. Thunuam in thu thei mahmah khat hi-a, Zomi tawh kisai nidangin Lamka gam ah ZNC a kipat cil lam pek panin zong a kihel ngei mi khat ahih manin minam a it leh a vei ngiat khat ahi hi. Amah zong Nashville leh Atlanta ah Zomi Nam Ni zinmang dingin kisam ahih manin ka ciah ding nitak khat a inn vuah ka kimuh kik uh sim loh ka kithuah man nawn kei uh hi. Tua zingsang in Pu Langno tawh Oral Roberts Unievrsity (ORU) ka vel uh hi. ORU pen Zomite Tulsa ah hih zaha tam a tunna dinga Pasian vanzat khat ahi hi. 1991 in Sia Do Kham (Rev Dr Chin Do Kham) in hih university ah D.Min sin kipan hi. A nung ciangin amah zong sangsia khat in pang kik a, tua hangin Zomi USA a tung masate pawl in hih mun mah na zuan hihtuak hi. Hih university panin degree a ngah Zomi tampitak om ta hi. Tu-in university administration ah a sem zong tamkhop om hi.

February 18 in Pa T. Sawm Lian leh a zi Nu Zamnu in Golden Carral ah nitak ann hong nekpih hi. ZIOK makaipipa ahih mah bangin a minam itna leh kipiakna thupi hi. Zomite tuhun leh maban ding lunggulhna tampi ka kikum thei uh hi. Tuani-in Full Gospel Assembly (FGA) biakinn mun pha-in a pua lamah maan ka kizaih uh hi.

February 19 nitak lamin ZIOK Vice President Pa Khai in Golden Carrel mah ah nitak ann hong nekpih a, limtakin ka holim uh hi. Pa Khai pen ZIOK makaite lak pan a khangham pen pawl hi dinga, a thumuhna zong thupi kasa hi. Tua nitakin Pa Khai mah tawh FGA assistant pastor Sia Pau Mung inn ah hawh in hun nuam khat ka ngah uh hi.

February 20 in Pa Lianbawi (ZIOK Secretary) te inn ah nitak ann ka ne hi. Tua nitak Zomi Nam Ni kizang ding ahih manin hun ngah zolo-in ann ne bekmah ka suak uh a, kiholimna cih bang om manlo hi.

February 21 zingsang ann pen Pa Daniel Vum Lian Mang Tangpua (Sia Paul Thuam Thang tapa) in Golden Carrol ah ann hong taih hi. Pa Disciple Kap Sian Thang (Sia Do Kham paneu tapa) leh Sia Hau Mung (Siapi Tuanno tapa) tawh ka li-un hun nuam ngah in minam vai mah ka holim tangtang uh hi. Hong tutpih lawmte pen leitung pilna laitan zong a nei vive ahih maun thu thei-in muanhuai mahmah uh hi. A veina uh leh a nasepna uh thupi ngiat hi.

Tulsa ah ka lawmnu a adingin a pute ahi Sia Khamno, Sia Kap Mang cih bang hawhloh theihloha ka ngaihsut pawlkhat inn ah ka hawh thei hi. Rev Dr Cin Khaw Kham @ Sia Khamno, pen Far East Mission Church (FEMC) ah Senior Pastor ahi hi.

February 21 nitaklamin ama inn ka hawh thei hi. Sia Khamno holim siam mahmah a, a thugen ngaingai leng pilna zong tampi om in nuam kasa hi. Pasian in a tate zong thupha tampi pia-in praise and worship lamah kizang mahmah uh hi. February 21 in ZIOK makai lutangte in Sen annsai ah nitak ann hong nekpih hi. Tua hunah thupi kasak mahmah khat pen, makaipi Pa Sawm Lian in tutung Zomi Nam Ni lawhcinna hang pen makaite in tavuan tek a zawh man hi, ci hi. Tua mah bangin makai dangte in zong makaipipa mahmah kipiakzawhna leh thusiamna hang hi, ci-in thusiamna a kipaih uh pen thupi-in etteh huai kasa hi. Amau tavuan tek zo uh hi.

February 22 nitakin Mualnuam khuasuak Tulsa khuasunga omte kipawlna panin tutpihna hong nei uh hi. Nasepna gam ahih manin hun awng ngah kibanglo kawmkal ah a hunkhop mah tawh ka tukhawm, holim khawm thei uh hi. Mualnuam pen ka pu leh pate pianna hi-a, ka pu ka pate 1943 dong na teng uh hi. Ka pai ngeiloh hangin pu leh pa’pianna ahihna tawh itna leh kizopna lianpi kinei hi. Tulsa ka tun ciangin Mualnuam khuasuak mi 40 bang om cih ka theih ciangin ka angtang mahmah hi. Ken amau adingin bangmah ka puak zawhloh hangin amau itna ngaihna tampi hong lak in sagawh zah in hong thupi bawl manun ka lungdam mahmah hi.

A diakin a bullam a ka gen bangin ka zintunna Pu Langno (Zuasiam) pen nidangin Thawn Kham’ lakhui masa a sponsor-pa hi-a, amau zong Mualnuam khuasuak na hi ahih manin ama inn ah tawldamtakin hong zindo ngiat pen thupi kasa hi. Pi Cingtawng thusiamna leh hong zindo siamna, nek leh dawn akipan vai khempeuh hong saipihnate thupi lua hi. I pu leh pate khualui nangawn in ki-itna leh kinaina khangsak ahihna ka phawk hi.

Thukhupna:

Tulsa ka khualzinna hang taktak pen Zomi Nam Ni zinmang dinga hong cialna bangun a pai ka hi hi. Ka tun cil a hong vaidawnte akipan, hong zindo, ann hong nekpih, hong khawlpih, huhna hong pia, leh nisima hong kithuahpih banah ka tangthu adinga ciamteh tham hong bawlsak ZIOK leh Tulsa Zomi khempeuh tungah ka lungdamna hih lai tawh ka ciamteh hi. A tunga ka gen sung pan ka mangngilh omlo dinga ka ngaihsut ahih hangin a om khak zenzen leh ka tup hilo hi ci-in hong sansak un.

A tawpna ah February 23 ni-in United Airlines tawh Houston (TX) tawnin Phoenix (AZ) ciah dinga ka pai ciang Tulsa Airport ah hong kha Pu Langno leh Nu Mandawng tungah ka lungdam hi. Nu Mandawng pen nidang Singngat a om lai pek panun ka thei hi. Biakna pawlpi khat ah om khawm banah, 1996 in Singngat Hill Model High School ah sangsia tawmvei ka sep sungin amau inn pen ka kiphualna khat hi. Zomi tul li val omna Tulsa ah ka paima-in tua khua ka meltheih ngeisa khat bek om hi ci-a ka ngaihsut pen, ka ciah ciangin Pasian in meltheih, lawm leh gual tampi tawh hong ciahsak ahih manin Topa min ka phat hi. To God be the Glory.

 

Dr Pum Khan Pau (Tongsan Columnist)

Post-Doctoral Fellow, Arizona State University, USA.

 

 

Ei le Ei Kitheihsiamna

PDFPrintE-mail

Written by Tongsan Admin Saturday, 14 March 2015 05:03

R-SangaThupatna: Kitheihsiamna kammal in a gen omzia bel i mihinpihte ngaihdan, khosakdan, lungsim putdan leh nek-le-dawn toh kisai chihte tengteng theihsiampih a eimah, mimal hinkhua pen mundang a om mite nuntakdan paizia toh kituaksak chihna ahipen mai hi. Tuni in gambung tuamtuam ah nungta in, Zomite leitung buppi dapsuak a kithehzak in i khosa uhi. England, USA., Australia, Malaysia, Singapore, Thailand, South Korea, etc., etc., chihte ah Zomite in neek-le-dawn diing ngaihsutna ziak a sum bawl in kithehzak suak hi hangh…

Leitung nuntakna leh khosakna haksat luat ziak leh khanvual enna uang tektek ahihman in Kawlgam-Vaigam kia hinawn lou in tongsan theih louh sing gam, Mangkangte tualleenna gamte nangawn ah sawlbang hei in sesum vang a vai loukuan in Mangkang-Mangvom thunuai ah munchih-mualchih ah Zomite kithehzaak in om suak hi.

Tunnu Zogam Nuam:  I pu-i-pate, nidanglai hunte in niang-le-tai in Zogam vangkhua tualnuam ah ngabang leeng in kua dang ngai lou in ana khosa uhi. Mahni kitoudelh zou leh India gamsung ngalsaute leh gamdang mite in huchibang a mahni kitoudelh leh kivaihawm a khosa Nam khat om uh ahihlam himhim phawkpha lou uhi. Tua mahbang in amaute (Zomite) in zong leitung ah midang khosakna nuam leh khovel ah mihing om uh ahihlam phawkpha vet lou uh suak hi. Tulai hun bang a kikawmtuahna mumaltak om lou ahihna ah khua khat-le-khat nangawn kikawmtuahna haksat ziak in suangtu khat hinapi in midang, melmak bang mai a kidou leh khua-le-khua kisimtuah a ana khosa nilouh uh ahihman in neektak zonna, siamsinna leh laizilna lam ah ana tuantual petmah uhi.

Gam leitang hauhsakna leh sing-le-gua, gam-maang hauhsaknate leh leitung-leinuai a gou manpha Zogam huapsung ah om ahihlam himhim angaihsutna uah ana om pha baan lou kia tham lou in, phawkpha vet lou ahi uhi. Nidanglai Louneihdan ngeina (Jhum cultivation) tunitan dong in Zogam ah neekzonna omsun asuak lailai hi. Huchi ahihman in Lengtong – Pauno in hiai anuai a bang in Lavui ana gelhkhia in zaila in awi ngiahngiah mai hi:

NIM NA DILDIAL E (Phuak/sa: Lengtong Pauno)

Tunnu Zogam vangkhua tualnuam angai lou lah hi lou,
Tun-Zua Laizomte angai lou lah hi lou;
Lungdeih thai-kawi leh von nih-thum toh gibang khen in,
Tongsan theih louh sing gam ah sawlbang ka hei.

Taikhua hong val zang ni hong suah sial vai lou-kuan in,
Sun nitum in muikhua hong zing mah zongleh;
Sun-le-zan mial-le-vak Mangvom Mangkang thunuai ah,
Tou-le-salbang sesum vang maw ka zaitha.

Tung Sianmang aw na bawlsa tung sun nisate lah,
Sou na vingveng e, sou na vingveng e;
Ahihhang no’ng piak thuphate khat-khit-khat simkiik le’ng,
Nim na dildial e, nim na dildial e.

Sesum aw kei a ding’n na leenna vang in la e,
Na tuanna batlah tulleel dawn saang mah ei;
Kei a diing in na zaalna kul in thuk mah sa’ng e,
Chikchiang pakbang kong lou, kong bat, kong tawi diam?

Phungching lian Lunmangte lah zinleeng doh-ai siam hiam?
Genthei liangvaite lah mangbang semsem ungh;
Kong thum hong za in Toupa Kawlgam vai hong hawm in,
Nuntak suahtak zaitha damna ngai ungh e.

Tung Sianmang aw na bawlsa tung sun ni sate lah,
Sou na vingveng e, sou na vingveng e;
Ahihhang no’ng piak thuphate khat-khit-khat simkiik le’ng,
Nim na dildial e, nim na dildial e.

Gam Kipaikaan Minam Itna:  Tanglai akipan tunitan pau-le-ham kidang lou, tunsung khat pan piang minam khat hinapi in, Zomite lungtuak a kalsuan thei lou a hun bangtan hiam khat-le-khat midang bang mai a kikoih in lungtup lah khat hi ngal vaihawmkhawm thei lou a i om nilouh uh bangziak hi peuhmah diing hiam chih ngaihsuthuai petmah hi. Gam kipaikaan minam itna anei thei nai lou mah kihi lailai hi hiam chih ngaihsutna ah thuklut mahmah mai hi…! Tua ahihman in, Zosuante, mimal tek i kivelphat chiat uh thil kul-le-poimoh petmah ahi hi. Mahni Kivaihawm Gam thum ah Zomite kikhenzaak in, mahni mummum a kitumbuzial in khosa chiat uhi. Chittagong Hill Track, Bangladesh; Mizoram & Manipur, India Mal-Suah leh Chin State, Myanmar (Burma) chihte ah Zosuante kithehzaak in khosakna haksatak leh mahni kivaihawm thei lou a koih a om in, melmakte thunuai ah suak-le-sal dinmun toh kibang a khosa hi hangh. Suahtakna leh Zalenna lung-gulh in Salpha mi bangzah hiam in leitung nuntakna nusia in, Nam-le-gam a diing in ahinna uh ana pia zong mi hunkhop ana om khinta uhi.

Abiktak in, Myanmar (Burma) a om, Zomite Kawlgam kivaihawmna huaise lua ahihman in, munchih-mualchih ah kithehzaak in America, England, Australia leh mun dangdang ah tuni in khosa uh a, Tunnu Zogam vangkhua tualnuam angai lou lah hi lou, Tun-Zua Laizomte angai lou lah hi sam lou, Lungdeih thai-kawi leh von nih-thum toh gibang khen in tongsan theih louh sing gam ah sawlbang hei in, Zogam Nuam ngai vungvung in mi tampite khovel lehlam ah nungta uhi. Sesum bawl in guhtui kang khop hial a kiloh tawm a khosa in zi-le-ta vakna diing ngaihsutna ziak in haksatna tuamtuam, lungzuan sial in khosa uh ahihdan Lengtong – Pauno Lavui akipan i theithei hi. Zogam Nuam ngai vungvung a, i minam itna toh anungta mite lungtup leh suangtuahna i phawkpih a, Gam kipaikaan minam itna toh mahni Inn-lum pansan a omte in lungpi geel hun petmah ahita hi. Gam tuam leh mun tuam a om Zomite in Nam khat (One Nation) i hihlam uh kiphawkthakna leh khanlohna hoihtak Zosuan sung ah hong piangkheta ahihman in lungsim tawng ah kipahna liantak toh ‘Zomi Mainawt, Mainawt’ chi a kalsuan chiat diing in kihanchiam tek ni.

Sabiak Kikhat Biakna Paizia Kituam:   Biakna pen hon gawmkhawmtu hoihtak ahihlai in lungsim a kikhenna hon tuntu zong ahi thei leuleu hi. Banghang hiam chihleh, leitung buppi ah Kristian kichi sapsap sung ah sabiak kikhat biakna paizia kituam ziak a lungsim a kikhenna thuktak hon tuntu in pangthei veve hi. Tua ahihman in Biakna pen gawmkhawm diing hi het lou in; Biakna in hon gawmkhawm theileh chih pen ngaihsuthuai mahmah khat ahi hi. Etsakna khat gen zual le’ng: Roman Catholic Church paidan ah biakna kichian anei khat ahi a; Protestant Groups tengteng zong biakna paizia tuam kineih chiat ahi uhi. Church of Christ in Biakna aneihdan pen tua i gente tengteng lak akipan akituam vilvel khat ahi leuleu hi. Tua kawmkal lak ah mi kimkhatte in Kristian kihi vek hiven - Biakna gawmkhawm diing ahi chih ngaihdan nei pawl om kha naak sek uhi. Huchibang ngaihdan neih pen midang khenkhatte lungsim ah kikhenna piangsak thei ahihman in thil hihtuak ahih louhdan theihsiam diing in ahoih mahmah hi.

Khovel in ahon theihdan a akibang Sabiak (Religion) anei Nam i hihman in Biakdan paizia atuam nei tek himahle’ng zong i minam thil toh kisai leh neekzonna ahihke’h Khovel kivaihawmna ah kigawmkhawm theih ahi chih kichiantak in thei kilkel chiat le’ng deihhuai petmah hi. Biakdan paizia atuam ziak a kituam bawlna leh hun paisate a lungsim a kikhenna ana om zel sek pen vuimang vek ahih masiah Zogam pallun thei lou diing asuak hi. Zosuante sung ah lungsim a kituam bawlna ziak a nawngkaina tampi om thei ahihman in pilvangtak a kalsuan a pai khiankhian diing in Nam makaite leh Pawl tuamtuam a heutu hihna dinmun neite khempeuh kiang ah hasotna chidamhuai i pia hi. Biakna paidan kituam zongleh Gam-le-Nam itna pen kituam lou ahihlam phawk a, pau-le-ham kituam zekzek Zomi sung ah ana om mahleh Zogam itna kibang a it chiat hi hangh chih Zosuan milip in i pomsiam chiat uh thil deihhuai mahmah ahi. Innteek pan chiat diing ahihdan i theihsiam hunhun uh Zogam hong pallun diing a, kipumkhatna hoihtak i lak ah ahong omta diing hi.

Thukhupna:  A detdou Zomite Kigawm-nawnna ngak in Khovel kilchih-mualchih a om Zosuante kiphatmoh thupipen ahihleh pau-le-ham tuam zekzek ahihhang a kitheituah vek Zomite sung ah “Kipumkhatna” ahi hi. Tunnu Zogam vangkhua tualnuam ah lungtuak ngabang leeng diamdiam a phungching kumtawn Suangpi beel peuh le’ng Zogam hong pallun diing hi. Nuntak-Suahtak Zaitha damna tuang hong tung diing a, Nun nuam sawlbang heina vangkhua tualnuam angai lou lah om lou, tongsan theih louh sing gam pan Zuapa’n sulhei in tuanglam hong zuan pelmoh diing a; Genthei-Liangvai huibang mau a kahtam sial om nawn lou diing hi.

Huai hun chiang in leinuai-leitung, gam-maang hauhsakna Zosuan sung a telsui mite’n gah tam seem suang diing leh adetdou Zogam khantouhna phungchingsak diing uhi; Ami zata Zosuante in pakbang lou a tawi in, Saulim tual ah von nih-thum toh ngabang leeng in lamtual sai in thum dildil pelmoh diing uhi. Atung a i gente khempeuh ataksuah theihna diing in bel leitung buppi huap a Zomite pangkhawm a, “Ei-le-Ei Kitheihsiamna” hoihtak kepbit gige kisam hi. 

By: Dr. R. Sanga (Imphal,India)

 

Kal Thak Suan Sin Dih Ni

PDFPrintE-mail

Written by Tongsan Admin Monday, 09 March 2015 23:13

59982 1396477475566 2581394 nKal thak suan ding na lau kha hiam? Nasep thak khat pepeuh kipat ding na lau kha hiam? Tu laitaka na dinmun tawh nop na sa lua lelngel hiam? A tamzaw in kei a kipan lau pepeuh lo ee! tu a ciang tawh lungkim lo ee! cih bangin kidawng kha thei ding hi. Ahi zongin I theih loh kalin a thak khat pepeuh kipat ding a lua khinkhian le tu-a dinmun tawh a lungkim lel vive kihi thei gige hi. Hih thu kei le kei kiphawk thakna hong pia thu khat gen pak leng, an sai ah nipi khat khatvei bang ka pai zelzel hangin an sai thak zong se lo-in, ka theih khitsa mun bek ka pai nuam zaw mawk hi. An vai khak ding ciangin ka nek ngei loh an peuhmah neksin sawm lo-in, ka nek ngeisa khat mah ka vaikhak tawntung zel kha hi. A hang ka ngaihsutkik teh ansai thak ah an lim ka sak loh ding patau, ka nek ngei loh an nam vaikhak leng lim kasak loh khak ding a dah ka hih banah ka neknek ngei sa an nam khat tawh a lungkim lelngel ka hih lamtak ka kiphawk kha hi.

A lauhuai ngeina lui:

I puansilh nikten zia a kipan kikhel ding haksa kisa thei ciat hi. Puansilh nikten pawl khat bang I muh teh “hi puan aw, tuapa, tuanu’ mel pua si ee! I cih sak khawng peuh om thei liang hi. A thak laih ding kisawm ngei lo-in, ei dan khat tawh a tamzaw kipaipai kha zel hi. Nupa kawmkal bangah silhleten kipuah kizep dan khel ngei lo-in, ngeina khat a om den keii khak huhau a nupa kicimtak tampi om kha dingin ka um hi. Tua mah bangin, I nasepna ah I sumbuk saite ah ngeina teng mah tawh kinamtak detkeii manin khangto thei lo banah supna a tuak tampi zong I om kha ding hi. I company nasepnate zong ngaihsutna thak neih loh luat manin za khang thei lo-in mi sawltak dinmun ciang bek tawh a kiveivei zong tampi kiom kha ding hi. Tua ahih manin ngeina khat bek tawh kalsuan denkeii pen khantohna ding hong khaktan a lauhuaipi khat na himawk hi.

Na ngeina luite bei sak in:

Mi khempeuh in khantohna ding kilunggulh ciat hi. Tua dingin sep masak ding pen ngeina luite khek ding ahi hi. Ngaihsutna luite khelin a thak ngaihsutna neih kul ding hi. Na nasep zia na khek kul ding hi. John F. Kennedy in “kikhelna pen mihingte nuntakna ah a kisam pelmawh thu hi. A beisa le tulaitak bek a mu den keite pen a mailam dinguh a phawk kha lo teng ahi hi” ci hi. Nilekha, kum kidang toto taleh I nuntakna khangto lo, kikhel lo a I om den keii khak leh bel eile-ei ki-et phat mahmah kul ta, kikhelna khat neih kul lua ta hi cih phawk huai hi. I kikhel nop het kei leh bel nuntakna pen khiatna nei mel lo hong suak mai ding ahi hi. Kikhelnopna lungsim le kikhel zawh ding thasanna in ngeina luite paihkhiat zawhna ding a kisam masa khat ahi hi. Mikangte paunak khat “to end something is to start something new” ci uh hi.

A thak na khat peuh I kipat zawhna dingin, a lui nate i bei sak kul masa hi. Biakinn khawngah “ka nasep lui pan hong kitawpsak ciangin dah mahmah in thu ka nget leh nasep thak ka ngah a tun sum lah tam sang zaw, zong nop kasa zaw pek hi” “ka van khempeuh hong kimat sak cihna ding thei lo, nasep dang ka kipat leh tu in ka tuahpha mahmah hi” “tan sawm ong zo lo ka hih manin, lai siangtho sang lamah ka kah khak pen tu in Pasian in thupha hong piaknop man ahih ka phawk hi” cih bang dan tecii panna tampi i zangei ciat kha ding hi. Tua khempeuh pen kikhelna tungtawn pan hong piang lawncinna na hi gige hi. Tu a dinmun tawh na lungkim zawh kei a na khantoh beh nop leh na nusiat kul ding hon khat om hi. Pammaih sa kei in.

Kikhelna phu ngam in:

Kikhelna sungah na lut ngam na dingin kimlepam ii thapiakna tampi kisam hi. Leitungah mi a tamzawte in a lawhcing kikhelna I ngah zawh loh pen, kimlepam ah thapiakna sangin kiawi lohna, kikhak tanna, a hoih ding muh siam lohna le tu a dinmun zong thupi khin lua ee, puapialpial se ken, koi mah lungleng sedah aw cih dan lam a kideihsak khialhna a tam zawk hang ahi hi. Mihingte in tu laitak a I din mun pen a val zaw in kisang ngaihsut kha a, tu laitak din mun nusia leng I ngaih ding khantohna pen kineu sek zaw kha gige hi. Hih thute in kikhelna sungah lut ding hong kihta sak ahi hi. A tatakin ngimna le tupna kician nei hi lecin na dinmun nusiat ding haksa na sa kei dinga, kikhelna sungah hangsantakin lut ding na lawp zaw ding hi. A hang pen na ngim na tupnate in kikhelna a kisap lam hong hilh man ahi hi. Lai siangtho sungah Pasian in Abraham thupha pia nuam ahih manin, a khantoh theih na dingin a theih ngei lohna mun ah paikhia dingin sawl hi. Tua pen kikhelna a phusak ahi hi. Joseph zong Pasianin thupha pia nuam ahih manin, kikhelna sungah a nungtak theihna dingin i sangamte muhdah theih dingin mang man hi. Mang man lo hi leh a sanggamteng le a NulePa tawh nuamsa lel ngelin om ding hi. Joseph a mangmat hangin a khangto hi lo zaw-a, kikhelna tampi sungah a nuntak khak manin a khangto ahi hi. Kikhelna sungah nungta a, kikhelna a phu zo khempeuh gualzo tawntung ahih lam Pasian in etteh theih dingin hong hilh kholhna zong ahi hi.

Mi dangte hong khel ding ngak kei in:

Zomite sungah Paintit gam a va pai masak teng pen hong khangto masa pah uh hi. Tua pen kikhelna sungah a va om khak man uh ahi hi. Kikhelna a phu masa pepeuh a khangto masa hong suak pahpah hi. Hi bangte etteh siamin eile-ei ciat khantoh nopna takpi le ngimna kician tak tawh kikhelna sungah I kalsuan ding hun hi ta hi. I kimlepam hong khel ding I ngak leh kizekai ta ding hi. I nuntakna pen midangte’ hawl suk, hawl toh ding hilaizang lo hi. Tolstoy in “Mikim in i leitung kikhel ding kingaihsun ciat napi eile- ei kikhel ding pen kua mah in kingaihsun se lo hi” ci hi. Hi takpi mah hi. Leitungah a khangto nuntakna i ngah nop takpi leh mi dangte hong khel ding ngak lo-in ei mimal ciat kikhel tawmin kal thak suan hun hi ta hi. Michael Jackson in “limlang maan sunga mipa/ nu tawh kipan in kikhel in” ci hi. Nang mahmah kikhel masa in a cihna hi lel hi.

Thu khupna:

Na khantoh theih na ding pen nang khut sungah om vivel hitangial hi. Na kikhel ding leh kikhel loh ding zong kua hong hah sawl theih thu hi lo-in nang ma tel ding ahi hi. Pasian in i etteh theih dingin i mai ah tampi hong koih sak khin zo hi. Kikhel cihteh thu khelkik themthum cihte hi lo hi. Mun thak zuan ding, nasep zia khek ding, kal thak suan ding, ngeina pai denkei lo ding cihna ahi hi. Ni khat khit ni khat kikhelna nei lo a na om cip leh pen na mailam ah gual zawhna lianpi a ngah ding nanglenang a kithat na suak ding hi. Nang kua hi ding cih pen nang tung bekah kinga hi. "Kal thak suan sin dih in" nung hei nei ken. Pasian in tua kikhelna kalsuanna thak sungah hong om pih ding hi.

By: En Khat Thang (USA)

 
Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Page 5 of 220

TONGSAN Video

TONGSAN Photo Gallery

TONGSAN Weekly Journal

Who's Online

We have 78 guests online
Joomla Templates and Joomla Extensions by ZooTemplate.com