zomi aw lung lau ken!

ARTICLES
BLUE GREY RED

Warning: Attempt to modify property of non-object in /home/tongsan/public_html/archive/components/com_jomcomment/mambots.php on line 142

Warning: Attempt to modify property of non-object in /home/tongsan/public_html/archive/components/com_jomcomment/mambots.php on line 142

Warning: Attempt to modify property of non-object in /home/tongsan/public_html/archive/components/com_jomcomment/mambots.php on line 142

Warning: Attempt to modify property of non-object in /home/tongsan/public_html/archive/components/com_jomcomment/mambots.php on line 142

Articles

Lai Nasepna

PDFPrintE-mail

Last Updated on Tuesday, 10 March 2015 23:14 Written by Tongsan Admin Saturday, 07 March 2015 22:31

2015-03-09 08.44.56-1Zokam tawh lai kihawmkhia te sungah Nipisim tatsat lo a kihawmkhia Tongsan Newspaper in kum 10 sung hong kalsuan theih manin Pasian tungah lungdamko in, a sem abawl tanute khempeuh tungah lungdam thu ka puak hi. Kum 10 cingta ahih tawh kiton in abeisa sangin laimal le laidalte akipan thuthak tuamtuam te hong kim semsem zaw lai ding cih lamen i hih manin lungdam huai kasa mahmah hi. Kum 10 tunna dingin mipite in i theihpihloh haksatna le lungkiatna tampi tuak ding uh ahih manin, hih zahtak a minam le lai itna takpi tawh maban hong zomsuak Tongsan tanute pahtawi huai mahmah hi.

Leitunga a piang kha minam khempeuh in amau minam ngeina, lai, pau le gamte puah nuam ciat uh hi.Tua banga a puah nuamlo minam a om zen zen le pen minam mawlpente hi kha ding hi.Tua minam puahna milipte ngaihsutna muhna geel dan te lakkhawm na dingin tulai pau in ci leng Media mah hong phamawh pen hi. I Zosuan pih i sanggam pawl khatte bang en leng a gam khawkno khuapi sungah sim sengloh tadensa Daily, weekly le Monthly suah ziahziah uh a, milipte ngaihsutna muhna le geelna khempeuh hih tadensa tuamtuam te tung pan mikim in theithei uh a, a ngaisutnate uh puak diamdiam thei uh ahih manin a gam uh zong khangto in mainawt deuh pah uh hi.

Lai lam nasepna ah Zomite pen a budelh deuh zong i bang uh a, tadensa khat suah pan leng lamzuih kik pah pah zel hi.Minam picingh minam le gam a it tak tak te in amau teenna gam le khua bek hilo leitung mun tuam tuam a tung dingin tadensa hawm khia ziah ziah uh a, ei Zomite in nisim i simding tadensa khat zong i neih zawh nai loh lai lai pen khasiat huai mah mah a, pan i lak na ding tam mah mah lai hi.Zomite in i bawl theih sun kumkhat sunga khat vei suak Magazine cih bang ciang hi lel a, nisim tadensa i cih hih Lamka Bazar, Manipur Express etc i cih te pen Manipur a teng Zomite kiang bek tung zo lai ahih man in hih sanga tangzai zaw a ma i lak ding kisam hi.

Nidangin Manipur pan Mangkam a suak “Thuthang Daily” Pu T.Gogin(L)in a suah laiin Manipur gam sung bek hilo Mizoram, Meghalaya le gam tuam tuam a Zomite om na te ah puak zo a, miten zong thupi ngaihsut mah mah uh hi.Hih in Zomite kiitna ki tanauna khangsak hi. Zogam lamah leu leu pen Japan gal khit cianga Tedim gam leh Zogam sung thu i zak theihna khat pen Tedim pana kikhenThukituahna lai hi a, pawlpi thu i zakna pen Tedim Baptist Association te khet Lungvakna lai ahi hi. Kum 1961-63 sung Rangoon pan S.B.Khual Za Kham le Pa G.H. Gin Do Lian in a khet uh Nipikal sim thukizakna Zomi Tangko kici pen Kawlgam sung bekah hi loin India gam dongin kihawm ahih manin nasia takin Zomite ki-itna, kiphawkna leh kiho theihna piangsak hi. A mantakin ci leng India gam Zomite in Kawlgam Zomite le Zogam tangthu a theihna le zakna pen Zo Zum te hiam , Pawlpi (ZBC)hiam tung pan hi masa loin Rangoon Zo sangnaupangte’n 1952 pan a khet uh Hill Chin Student Union Annual Magazine le Zomi Zingsol, Zomi Magazine kicite peuh tung pan hi zaw hi.

Tu in Zomi mikimte simtheih ding Tadensa Tongsan hong kihawm khia in Kawlgam le gam tuam tuam a om te in zong Internet tung pan i en thei sim theita uh a,i minam in mainawt pih mah mah ding hi. Hi thei liai hi le a laidal mah mah tawh gam tuam tuam ah internet a en zolo te sim dingin hawmkhia zo lai leng Zomite in hih sangin nakpi takin phattuam pih zaw lai ding hi hang. Zomite milip i et ciangin kilawm hun khop hinapi hangin laibu i bawl te a tampen copy 1000 le 500 cih ciang bek bawl i hih man hih in laisim taima, kizen minam i hi kei hi cih hong lak mah mah hi.Mipil misiam ten gim leh tawl kawm le hun tampi beia a bawl laibute leina dan i thei kei a,sim i sawm kei le bel a mawl ding, mi a pha zolo ding te i hi uh hi.Tadensa i cih pen Zomi nam mun tuam tuam gam tuam tuam a omte khibanga hong khih khawm tu ahi hi.

Zomiten tulela ei Zokam tawh International News ih neih sun in hih Tongsan mah hi lel pah hi. Hih bang zahta a tadensa gam tuam tuam a Zomite huam zo ding bawl i thadah luat man in i minam le i gam zong khan ding bangin khang zo nailo hi.Tadensa kihello in gam khangto thei taktak lo a, tua hangin tadensa le a kizoppih “ Media” pen “ The fouth Pillar of Democracy” na ci liang uh hi.

Tadensa semte' Theih dingte:

Biakna khempeuh in ki makaihna ding laibu i neih tek uh a, Muslim ten ‘ Koran’ Hindu ten ‘Vedus’ Khristian ten ‘ Bible’ i nei uh a. Hih laibu te tung tawn in sep ding le sep loh ding tanpha in i kisinsak thei hi.’Citizen Journalism’ pen mipite in thuthang i kaihkhop, i pulak banah internet tungtawna i pulakna ahi ciin wikipedia in hong lak hi.Citizen Journalism pen nisim in minthang to to a, weblogs, chatrooms, message boards, wikis le mobile computing tungtawnin mipiten thuthang pulakna lamah mai i nawtta uh hi.

South Korea a Ohmy News tadensa motto pen “ Every citizen is a reporter” cih ahi hi.’Khawpi a teng khempeuh te pen thuthang pulaktu i hi hi’ cih na ahi hi. Tua mah bangin kum 2009 Iran election protest pen mipi ten twitter tung tawnin nasia mah mah in pulak uh hi. Mipite in Professional Journalist nasia mah mah in i huh thei a, i theih khak thuthak te maan mah mah a i pulak zel ding cihna ahi hi. Whatsapp pen leitung milip 60,000,000,00 liangin zang uh hi. Hihte lakah Zomite zong i kihel hi. Tua ahih man Citizen Journalism tawh kisaiin i theihna i khansak ding pen aana ahi hi.

Pasian thu upna, Khristian suahna pen ethics sinna hoih mah mah ahi hi.Laisiangtho in sep ding le sep loh ding tel takin hong zasak a, ciimna tam mah mah om hi. Tadensa saitute le a teltaka suimi nih Lorenz le Vivan ten Journalism tawh kisai i theih dinga kilawm hih bangin hong luikhia uh hi. Golden mean: Kum zalom 4 kim in Aristotle in hih theory na mukhia a, a deihna pen thuthang a thulaigen ding hi a, gup le gup loh om tuam lo ding cihna ahi hi.Midang tunga thu i gen sawn ciangin deihsak tuam khen tuam neilo a, centre mah mah a thu suah ding cihna ahi hi. Hih pen ahoih Journalism te om ding dan zong ahi hi.

Utilitarianism:  Hih pen Jeremy Bentham hong bawlkhiat hi a, John Stuart Mill in hih theory pen hong puahpha hi.Milip a tam pen te tunga dotna piak ding, a tam thei pen tung pan a, a dawnna uh ngah sawm ding ahi, thumanlo tampi kihel thei ahih man a hi hi. Hih theory pen investigative leh interpretative Journalist ten phattuam pi peuhmah uh hi. Golden rule:  Hih theory pen Judeo Christian ethics cih in zong kithei hi. Laisiangtho in “ Nang tungah hong kibawl ding na deih bangin, midangte tungah bawl In"  (Mat 7:12). Mi khempeuhte Journalist i hi uh a, ahizongin Professional Journalist bel i hi kei hi.

Tulai leitung pilna in mihing lungsim ki tuak peuhmah lote zong whatsapp/face book tungtawnin hong kizom sakta ahih manin i thuthak khahkhiak te ah i ciim kilkel ding kisam hi. Citizen Journalist hoih mahmah i suak theihna dingin na khempeuh hoih le man taka i telkani ding kisam hi. Tua i suikhiat te Tadensa ah ahi zong facebook ah a hi zong website hiam ah i khahkhia thei hi. Hih thu tamlo i gelh te pen tadensa saite theih dinga hoih te hi a, mikim in zong i theih ciat ding thupi hi. Zogam sungah zong Zomi mi kipia zo le gam leh minam it te in Zokam tawh Tadensa neuno khat TONGSAN hong phuankhia uh a, a kipat cil lai in aneu hang " Informative " mahmah hi. Tukum 2015 akipan Kumpi theihpihna (Redg) zong ngah sawnsawn cih thu i zak manin lungdam huai semsem hi.

Hih tadensa pen tuin maban kikek/ kibehlap / golta a, thu zong tampi tak tuangta ahih man Zomite i angtang mah mah hi. A semtute a tuanvaite lungsit peuhmah loin Zogam le Zomite a dinga nasepte uh thupi in nasia mah mah ahih man, ih biak Pasian in siamna, pilna thugil theih semsemna hong guan dinga, a sawt loin, hih TONGSAN Journal tungtawn in, leitung mun tuamtuam a om Zomite in khat le khat kimeltheihna, kiphawkna banah i lai le i pau mahmah zong pumkhat hong suaksak ding ahi hi. Tua hi in no’ a sai tute le hatna, siamna, pumpi cidamna hong pia ih biak Pasian tungah Lungdam kong ko’ hi.

Leitung thupiang, minam sung thupiangte i theih kei le mawlna/haina nam khat ahih manin, tuate theihna dingin laisim kisam ahi hi. Melmuh Tongsan pan i ngaih/ muhnop le TV etkul a, Tongsan / awsuah tawh i ngaihnop le radio i lei kisam hi. Tua mah bangin Tadensa (Newspaper) pan i simnop le Newspaper i lei/ tat kul hi. Tuhun ciangin pilna, siamna akipan na khempeuh a mawkna tawh kingah om lo aahih manin, i Tadensa neih sun ahi i Tongsan zong nam le gam, lai le pau itna le minam khantohna ding lunggulhna tawh hun le tha tampi piakhia in akibawl vanvan ahih manin, Zomibup in thupisim a, thapia in tatman i piak ziahziah ding kisam hi. Kumpi neihsa, bawlsa hi loin, ei le ei bawl / hawmkhiat ahih manin mimal khat ciat mahin tatman i piak le kalsuan thei ding bek ahi hi. Minam khantohna le thahatna pen mimal thahat tungah kinga hi.

Tongsan nasemte pen kipumpiak vive cih ka za a, ei adangte in amau sep bang semtheilo, i semthei phial zongin i hun pia zolo hi hang. Tua manin ei sum zong paizong theiten a sem abawlte thapia in, kumkhat -khakhat-kalkhat tatman cihte bek tham loin, a manawt ziahziah zawhna dingin i hih theihna zahzah tawh mapanpih ding kisam hi. Zomite sungah Tadensa akineihte sungah kum 10 sung Kawlgam galkap hun lai pek akipan khaktanna le bawlsiatna tampi a thuak pen hi a, tuni dong hong mualsuahna zong mipite mapankhopna hang ahih manin, mai lam zongah mapanpih ciat ni cih kong zawn nuam hi.

By: Pa Kham Do Pau (Aizawl, Mizoram)

 

 

Annek Kawm a Kihona

PDFPrintE-mail

Written by Tongsan Admin Saturday, 07 March 2015 20:48

1401547 651504858205062 387754273 oNasep na zon ciangin nang hong deih company pawlkhat in a siate uh nang tawh anne khawm ding, annek kawm a kiho dingin hong sam thei uh hi. Na annek kawm un kiho bek hilo in kitheihtelna (personal interview) zong hipah ahih manin hong deih tuak lua in an hong nekpih pah cih hetloh ding theihhuai hi. Na annek dan pan na kizat theih ding leh kizattheihloh ding, nasem dingin zattak ding maw zattaklo ding cih bangin hong ettelna uh ahi hi. Ankuang umkhawm siamlo mi khat pen nasem khawm dingin zong siamlo ding hi cih na hipah hi. Tua manin uliante in anne dingin hong sap ciang etlawm tak, kidawm tak, kimuang takin gamtang in. 
 
1. Annek Ding Thei Khol In:  Ulian khat in "'sun an' nekhawm ni in kiho ni" hong cih leh a mawkna in ann hong nekpih hetloh ding theipah inla, nang tung pan a theihnop dinga na upmawh teng na kigingkhol pah in. Annekna ding mun a gen pen ah bang ann teng kingah hiam cih kantel sim, en khol masa in. Anne taktak dinga na pai ciangin na nek ding theikhol in. Theihkholh a koih dingin ahi zongin 'ka theihsa om' bel ci samlo ding. A menu/laibu khawng en phot dingin a nek nuam mahmah ding, a tamlua lo, a nip khat vaikhak ding. A nek haksa na tel leh nesiam kei lecin buai gawp theih hi; kidop hoihzaw! Zu lamsang vaikhak kei in. Hong sawl teitei ahih kei leh zu peuhmah dawn kei zaw in. Zu hong khampih sawm teitei ahih leh lah a hoihbek thei in. Na mizia hong en hi gige hi. Singgah leh niangtui, coffee cihte bel dawn phamawhlo hi.
 
2. Kizep Siam In:  Kizep dan ding hong gen khol ahih kei buang leh a kilawm, a vallua lah ahilo in kizem in. Nik singlua, pheituam tom cih bang zang kei in. A kilawm ciangin kizem inla, uanglua tuan kei in. Kizem loh sangin themkhat kizem pen etlawm zaw, zahtakhuaizaw veve hi. 
 
3. Uliante Mai ah An Vaikhak Kei In:  Nang hong nekpih ding uliante mai ah nang an ding vaikhak daidai kei in. Ngakzo inla, gilkial lua bangin phe saisai kei in. Kimuang takin om inla, an duh lua bangin om kha kei in. An hong tun ciangin zong ama nek tawh kituak in damdam in ne in. Ngaklah lua leh nawhsa in nekhin pah kei in. Kam dim lua in an bak kei inla, tawmtawm in bak in; tua hileh hong hopih ciangin na dawnna nuam ding hi. An kam dim lua leh na pau kician lo ding ahih manin. 
 
4. An Vaikhaksa Nolh kik Kei In:  An na theih telloh na upmawh a na vaikhak khit khat nolh in pia kik kei in. Banghang hiam cih leh ansaite tawh na kiho dan ulianpa in nang hong encik gige hi. Na duh kei kik phial zongin lungdam takin a duh mahmah bangin la inla, lungdam ko siamtakin ne in. Uliante in midang tawh na kiho dan hong encik ahih lam phawk gige inla, kamdam, awnem, kamnel zang hamtang in. An buasak hiam, nang buaksuah hiam na hih leh zong heh kei inla nuihmai tawh nasemte hopih in. Na maitang hong ki-en ahih manin heh mel, maigum, thangpai mel pua kha kei in. Tua banga na kidop theih leh vai haksa phu kha lecin zong lungduai zo ding, maitai thei ding; hehna, thangpaihna, lungkiatna lak pan mite muh ah picingtak in om thei, kidek thei ding cih kilang hi. 
 
5. Na nasem khat bangin zong Hopih siam In: Ulianpa pen nang tunga thunei ding, nang hong van ding ahih hangin nasem in hong kila nailo ahih manin nang tunga hitak nailo ahih manin tua na na annek sung uh nang nuaia bangin hiam, nang kikimpih bangin hopih kisin limlim in. Banghangin hih company ah sem na hiam? Bangtan semta na hiam? Bangteng nopsa, bangteng haksa sa na hiam cihte dong siam in. Nang kimuhna leh tua mun ah sem hile cin na lamette zong kuppih siam lel in. Tua hileh nang zong ni khat ni ciang ulian na suah ciang na nuaia semte na makaih siam ding dan tel pah ding hi. Hong muhna sangto hiaihiai ding hi. 
 
6. Ama Hong Dot Hun Ding Ngakin Pilvang In:   Nang hong nekpih ulian in nang tung pan zong theihnop honpi khat nei ahih manin hong dot ciangin na dawn pah theih nadingin na kigingkhol in. Hong dot mateng lah nang leh nang kigen pah saisai kei in. A tamzaw ah annek khit, gilvah khit ciang hong dong pan ding hi. Annek khit ciangin ciahpah ding bek lungsim ah koihlo dingin, kihona a kipanpan ding hi cih thei in. Niangtui dawn kawm, singgah nek kawm in kihona kipanpan zaw hamtang hi. 
 
7. Lungdamko In: Nang hong hopih ulianpa tungah annek lim ciin lungdam ko inla, ann hong nekpih hangin zong lungdam ko in. An khamval a om hangin pua, ciahpih ut kei in. 
 
Tuhun ciangin hih banga kihona tam semsem ahih manin pilvang, kidawm siam, kamnel, kamkhum leh gamtat hoih tawh a gamtang siam tek dingin Topa in Zomi khangnote hong siamta hen. 
 
(Khangnote ading deihsakna tawh kong gelh hi. Ka lungdam]
 
By: Dr. Hau Za Cin
 
 
 
 

Makai le Ulian

PDFPrintE-mail

Written by Tongsan Admin Saturday, 07 March 2015 20:36

1401547 651504858205062 387754273 oMi makaih cih pen a baih om ngeilo hi. Mihon makaih pen a baih hi hetlo hi. A kisam theihna na neih kul a, a kisam siamna na neih kul hi. Makai hi in ulian hitaleh mi makaih uh, mi kem uh ahih manin a kisam theihna leh a kisam siamna a neih nak leh a baihzaw deuh ahih tei hang 'a baih' omlo a, siam taktak cih zong a om theilo ahi hi. A kisam banga zatsiam ding leh a kisap hun a hang taka dinkip ngam ding a kul ahi hi. 
 
Makai cih leh ulian cih pen a kibanglo ahi hi. A nih tuak un mite makaih, huai, khoi, uk in kem hinapi, a kibang kiuhkeuh lo ahi hi. Ulian te in a kisam khempeuh vaihawmsak in hilh a, makaite in mite kisap khempeuh pia in sinsak a, a siamnelna ding un pattah toto lai hi. Ulian in a omsa tungah vaihawm a, makai in a om nailo teng kaikhawm in a tup gam zuan dingin dinkhiatpih, paipih hi. A omsa zeek ziau a baih ding a bat hang baih tuanlo a, a om nailo suktuah khit ciang a kisam teng kaikhawm a, hilh a, lawpsak ding, theisak ding, telsak ding, a lunglut dinga zol ding, a mai vuah pai dingin a tup tungsak dinga tonpih ding cih pen a baih hetlo ahi hi. 
 
Sanginn ah sangsiate in sangnaupang a omsa teng tungah a kisap uh pia a, pattah in a tupna uh a tunna dingin hilh uh hi. Papi khat in a inn sungah a om nailo a zi ding la in, a tate hong pian ciangin a bul panin pattah in a picing dingin khoito a, a manpha nuntakna a nei hidingin pattah picingsak to uh hi. Biakinn ah upate in pawlpi mite a omsa tawh nasem in kikum in vaihawm in genkhawm uh a, a hoih nasep sem dingin kalsuan uh hi. Khuasungah minam makaite in mi tuamtuam - pawlkhat bang cikmah a kimu ngei nailo nangawn huai in kaikhawm in kipawlna sungah a lunglut ding uh genpih in, a tup a sawm uh hilh in, a kisap uh tawh a kisap loh uh tawh, a lawp ding, a uuk ding, a nungzui dingin in zawn, zol uh hi. A ma muhkholhna lam tawn a paitek ding leh a nuam gam i tun ding genpih, musak, theisak in a tup a tun dong haksa taleh kuamah kinusia lo dingin thapia in tawsawn a, a pai lah ciangin zong zol bawl zel, maiet zel, kun' zel in paipih hi. 
 
Makai nasep leh Ulian nasep a kua a baihzaw ding, a kua a haksa zaw ding cih na tel theih ding ka umta hi. 
 
Uliante a nuaia mite khempeuh amau sep ding ciat sem dingin thalawpsak, hilh in lawpsak ding hanciam hi. A omsa, a kizangsa nasep dan, mite uuk dan namte thei in tua bek tawh hihhih leh zong a mite mainawt zel, a sep ding uh khin den lel hi. Makaite in bel a upmawh loh penpen dan nangawn un vai hong om leh bangci sep ding, bangci nawk ding, a mite bangci kep ding cih nangawn luzanga sam pulh liangin a ngaihsut den kul ahi hi. A omsa omlo in a thak phuan den kawmin a sep a kul hun zong om hi. Sepsa dan bek zuilo in a kul leh sepsa dan nangawn pelh in mite kisap tawh kizuiin khel ngam, bulpat ngam kul hi. A mite khahsuah leh a tup tunglo ding ahih manin a mi leh a tup a thupina, a kisapna, a pawimawhna akibang ahi hi. A mite a tupna tunpih ding, guak tunpih lo ding. A mite tawh a tupna tunglo in a mite in lampialsan khin cih zong om thei hi. Tua manin makai nasep pen a baihlo ahi hi. 
 
Tua ahih manin, makai ahi a, ulian ahi zongin a nunga hong zuite muh theih dingin a pai, a madawk zek mah a kisam veve ahi hi. Mite muh batloh a hat in a pai lehlah a mite in delhpha lo ding. Ziakai lua lelah mipi in hawmthawh in makhelh kha thei hi. Tua manin mite phak khom ciangah pai in a kisam vante, nate, pilna, theihna, siamnate a piak, a hawpsawn den akisam ahi hi. 
 
Muhkholhna a kisap tuaktuak hangin a kisam zaw diak bel makaite ading ahi hi. A huampi in mu thei dingin, a lungkiat sawmlo mi hiding hi. Haksa taleh a dinkhawl utlo, khawl kullo in pai ding cih lungsim a neimi ahih kul hi. A muhkholh metna leh hamphatnate peuhmah mitsi manlo lianga en a delhpih, a lappih a kisam ahi hi. A haksat penpen hun in zong a phunlo, a ciaklo, a kipasalsak den mi, a kuhkalna leh a hanciamna mite in a paktat ding bek a deih hilo in khangsawnte in a etteh dinga nusiat thei mi hiding hi. Min leh za deih man hilo in, tuahphat metpih ding deihna bek hilo in, a hoih a pha khat sep ding a theih hangtak leh muanhuai taka sem ngiatngiat mi ahi hi. 
 
Makai cih pen mite kiangah a thu bek in a gen, kam bek tawh a sem hilo in mite muh theih dingin a semkhia, a lakkhia ahih hamtang ding ahi hi. Mite a huh leh a lak, a sem thei takpi ahih na a kidawksak ahih kisam hi. Ulian zong tua bang mah in. A tamzaw ah numei makai hiam, ulian hiam ahih leh a deihna uh hangtak in gen ngam in pulak khia ngam uh a; pasalte in numei zah in gen ziauziau ngamlo zaw hi. Khat leh khat kihona uangbawl in, a kisam thute siangtho tak, tangtak in kidong in kiho theite makai muanhuai, zuihtaak, ettehtaak ahi uh hi. A mipite kiangah a kisap uh bang hiam cih dong ngam ding, a mipite tungah lungdam thu ko ngam ding, a kul leh maisakna zong ngen ngam lel ding (a tamzaw ah makai khat, ulian khat adingin hihte baihlo thei hi).
 
A zuihtaak leh a ettehtaakte in a neupen pan a lianpen dong a kibangin hopih thei uh a, a kisap uh a kibatloh hangin a kibangin en uh hi. Ama minthanna ding sangin a tamzaw hamphatna ding thupi masa hi cih khual hamtang a, a tup a tunpih man kei leh zong azom a makai, uliante in a tunpih dingin nusiat thei, nusiat ngam hi. Ama makaih sunga matut dingbek vai a gelte muhna sau neilote hi a, ama zoma makaite in zong a zop dinga nasep hoih a nusiat theite muhna sau nei, makai gina leh a muantak, a thudottaak mite ahi uh hi. 
 
Tuni in hong kidong hileh - nang makai sem ut zaw maw, ulian sem ut zaw? Nang makaih sungin bangteng na gel a, nang ulian sep sungin bangteng na sem khia a; na nunga hong pai lai dingte zop theih ding na nusiat nasep manpha, bulpat manpha a om hiam? Nang hong kidot loh ciang na lungkiat ding namte na sem kha hiam? Nang bek hong kithupi bawl hileh cihte nusiat in na nei thei hiam? 
 
Zomi khangnote in leitung kilumletna sungah hunthak kilut hi cih i theihna dingin makai leh ulian a kibatlohna, a kibatna, a haksatdan, a nopdan, a mawhpuak uh cihte kong luikhia gawp hi. Zomite in leitung mite kalsuan tawh kitona kal i suan ciangin hih bang thute i phawk ding a kisap hun om thei hi. I kim i kiangah minam khangto masate leh a khangto laitakte in a hun zuiin kikhel thei uh, kikhangkhan thei uh ahih manin a madawk toto suak uh hi. Zomi khangnote zong a madawk toto dingin Sian in hong siam hi.  
 
Dr. Hau Za Cin

 

 
Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Page 6 of 220

TONGSAN Video

TONGSAN Photo Gallery

TONGSAN Weekly Journal

Who's Online

We have 325 guests online
Joomla Templates and Joomla Extensions by ZooTemplate.com