zomi aw lung lau ken!

ARTICLES
BLUE GREY RED

Warning: Attempt to modify property of non-object in /home/tongsan/public_html/archive/components/com_jomcomment/mambots.php on line 142

Warning: Attempt to modify property of non-object in /home/tongsan/public_html/archive/components/com_jomcomment/mambots.php on line 142

Warning: Attempt to modify property of non-object in /home/tongsan/public_html/archive/components/com_jomcomment/mambots.php on line 142

Warning: Attempt to modify property of non-object in /home/tongsan/public_html/archive/components/com_jomcomment/mambots.php on line 142

Articles

Na Tate'n Nang Hong Sun le Na Lungkim Diam?

PDFPrintE-mail

Written by Tongsan Admin Wednesday, 08 April 2015 11:53

IMG 20141225 185259Mihing nuntakna ah Pasian thupha lian mahmah a kingaihsun khat pen tate ahi hi. Sum leh pai kizong thei-a, inn leh lo kilam thei-in, pilna siamnate zong kisin/kizong thei-a, ahih hangin eima hanciamna tawh ta kinei theilo, tanu tapa ding zong kitel theilo hi. Pawlkhatte in tanu tapa nei dimdiam a, pawlkhatin tanu bek a neih lai-in pawlkhat in tapa bekbek nei ta leuleu zel hi. Mihing thuneihna omlo ahih manin kitel theilo hi. Nupa kop khat in suan leh khak a neih theihna a hang khat bekbek om a, tua pen Pasian thupha hang ahi hi. Bang hang hiam cih leh nuntakna a piangsak Pasian ahi hi. Tuhun leitung pilna a san tawh kituakin mihing ngeina lo tawh ta neih dan nam tuamtuam a kizat theih sam hangin, tua nangawn zong Pasian in nungtasak kei leh ahithei thu hilo hi. Nupa khat pen tate hangin innkuan bukim/picing suak hi. Tua i cih ciangin ta neilo nupa pen innkuan hilo a ci nuam i hi kei hi. Tuhun ciangin nupa tampite ta neithei gige amau nasepna awlmawh zawkna hangin ta neihloh ding a telzaw zong omta hi.

Zomite in tate tawh kisai kammal zat zangkhai pawlkhat i nei hi: A pa mah banga pil, a pa suna thanuam/thukhual, a nu mah suna kamsiam, a nu banga migi, ai’h kei leh a hoihlo lamte zong, a pa suna lungtom hilo dia? A nu banga lungsim sia hi, a pa banga ama thu lo thu salo, a nu vunhawk linlian hi. Lai Siangtho in tate pen pate adingin minthanna lukhu a cih bangin, tate hoihna khatpeuh nu leh pate minphatna kipia paha, tua mah bangin tate siatna/hoihlohnate zong nu leh pate mah kikawk pah lianlian hi. Tua pen Zomite ngeina khat hi. Tate in pumpi ci leh sa, mel leh puam bek hilo-in lungsim puakzia ah zong nu leh pa kisun hamtang hi, cih kician mahmah hi.

Tate’n nu leh pate sut ding pen mihing ngeina hi-a, ahi ding mah a Pasian bawl ahi hi. Na tate’n nang hong sun kei mawk leh na heh nuam zaw phial ding hi; bang hang hiam cih leh hih in huapa/huanu sun cihnopna lungim piang baih hi. Ahih hangin limphatakin lungngai kik lehang tate’n nu leh pate a sut ding pen ahi ding mah hi, i cihnop hangin kisun kei le’ng hoihzaw ding hitah! a cihhuai na mun zong om hi. Pasian hehpihna tawh tapa khat ka neih khit ciangin tawlkhat sung ka lungsimah ‘na tate’n nang hong sun leh na lungkim diam?’ cih dotna hong lian mahmah hi. Mihing ngeina banga ta neih theih pen thupi mahmah napi’n tua zah mah a thupi khat pen, hong pia Pasian deihna bangin tate i kem/pantah siam hiam? cih ahi hi. Mihing nuntakna pen a gen hakpi khat hi. A kikem/kipantah ngekngek ta tampitak siatna sungah bual uh a, a kikem/kipantah hetlo ta tampitak mah siatna pelin hoihna tawh nuntakpha a zang zong tampi mahmah om veve hi.

Hih anuai-ah tate in nu leh pa kisun ahihna leh i kisutna pawlkhatte zong kisun kei le’ng hoihzaw ding ahihna i kikum ding hi.

Lim leh Mel Kisun:

 I innkuanpih khat midangte’ naungek suak tung en a pai hong ciah ciangin a kidong hamtang pen “kua sun ahia? a nu tawh a pa kua sun zaw ahia?” hi se hi. Naungek in a nu leh a pa khat zawzaw sun leh ahi ding mahin kingaihsun hi. A nu leh pa’ lim sun het kei leh lamdang kisa dinga, kimuanmawhna piang ding hi. Hoihna lam a kisun pawl a om bangin hoihlohna lam a kisun citciat zong om sese hi. Nu leh pate adingin zong tate in hong sun kei mawk henla midang peuh sun leh a dahhuai ciang bekah beilo dinga, kimuanmawhna hong piangin kisiatna nangawn hong tun thei ding hi. Tate in nu leh pate lim leh mel leh ci leh sa suna a om citciatna pen Pasian bawl mihing ngeina hi-a, a lungdamhuai thu hi zaw hi.

Khatvei mi khat in “Na pa sun na mahmah cia?” ong ci-a, kei zong “ka pa sun nong sak leh ahi ding mah ahih manin lungdam ei, ka sut loh khak ding a lauhuai zaw hi” ci-in ka dawng hi. Ka pa a theisa mi khatpeuh tawh ka kimuh tungin kimeltheihna ka kibawl zawh uh ciangin “Pu Nok Swan Lian ta hidinga kong upmawh mah” ong nung cih thei bang om ahih manin tuate in ka pa sun ka hihna kilangsak hi. Tate in nu leh pate lim leh mel hoihna leh hoihlohna, vomna, ngona sutna pen nu leh pa’ lungdamna hi zaw hi.

Gamtat Luhekzia Kisun:

Gamtat luhekzia kisun hamtang hi. Gamtat luhek manlang mahmah nu leh pate tate tuabang hamtang zaw deuh a, a zia nei mahmah te’ tate zong na zia nei citciat se hi. Lenglado siam, kamkhum kamnem a zang siamte tate in nu leh pa a sut bangin kam khauh a zangte tate pen na tua cilo tuanlo hi. Nu’ mizia leh pa’ mizia kibang kimlo ahih manin tate lakah zong pa a sun zaw deuh leh nu a sun zaw deuh om lai hi. A nih a lakhawm zong om veve hi. Papi khut nasep siam leh nupi khutzolte zong a tate un sun hamtang hi. Nu leh pate sisan pana piang tate a hih manin siamna lam leh siamlohna lamte kisutna zong a lamdang hi kei. 

Lungsim Puakzia, Uk leh Deihte Kisun: 

A lungtom mahmahte tate lungtom zaw deuh hamtanga, a lungduaite tate zong na tuaci kawikawi hi. Uk leh lunglutna, duh leh deihte ahih leh a kisun tampi a om tei hangin a kisun hetlo zong om thei veve hi. Hih pen a hun leh a mun in zong sai dingin ka um hi. Leitung khantohna tawh kituakin zong tuate kilamdang ding hi. Mihing khat i uk leh deih pen kikhel khel ahih manin hih tawh kisai-in a kip om theilo hi. Ahih hangin lungsim puak zia ahih leh kikhel lualo hi. Piangthaklo khat a pianthak ciangin a milui nuntakzia leh lungsim puakzia kilumlet thei hi. Hih pen mihing bawl theihloh Pasian vangliatna nasep ahih manin thu tuamin ngaihsun ni. Ahi zongin mihing ngeina ah nuak theihna leh lungduaina, lungkiat baihna leh thuakzawhna, lungtomna leh lungnemna, migitna leh duhgawlna, itna leh huatna cihte a tangpi-in nu leh pate kisun hi.   

Bang Hangin Na Tate’n Nang Hong Sun Kei leh hoihzaw Ding Hiam?

Paunak sungah “naupangte a neulai-in lampi man tawnsak lecin…” a cihna ah lampi man a cih pen Kha vai leh leitung vai ah khiat theih hi. Tate Pasian thu leh leitung vai ah pattah ding leh lamlak ding pen nu leh pate tungah kinga hi.

Na tate’n nang lim leh mel hong sun leh na ut mahmah bangin na mizia leh gamtat luhek ah hong sun leh zong na lungkim’ ding hi napi’n  na hihna bangbang hong sun kei leh a hoih zawkna ding tampi om hi. Nu leh pa tampitak in tate thu a thuhilh ciangin “ko na nu leh pa hong etteh bek vevua” a ci ngam nawnlo ding tampi tak omta hi. Bang hangin na tate’n nang hong sun kei leh hoihzaw ding hiam? Hong sun ding hi leh nangmah bangin zu a dawn kul ding, zatep, khaini, raja, kuva leh tep leh muamte a hih kul ding; nang bangin numei/pasal tungah zulhzau ding, sum leh pai ah citaklo ding, innmun logam vai ah duhgawl ding, thu khatpeuh a hoihna sangin a siatna bek mu thei zaw ding, midangte hoihna sangin a siatna lam bek buaipih leh gen belin nei nuam se ding, hi kha thei hi.

Na tate’n nang hong sun leh innsung sangin khuasung/gamsung thu awlmawh zawpah dinga, inn niangtui sangin hotel niangtui lunggulh zaw-in, innkuana vak khop liailiai sangin amah bek mah tang vakin a ut bangin om nuam zaw ding hi. Na tate’n nang hong sun leh ni dang ciangin amah zong a zi tungah citaklo dinga, zite a vuapahpah pasal suak ding hi; nangmah bangin a pasal simmawhin ci gagaih lel ding cihna hi. Na zi tungah na lungsim leh gamtat dan etteh huailo, na pasal bawl dan leh hopih zia pilvai lo, na teknu leh tekpa a kilawm bangin zong it lo, na mote sila bawlin itna tawh en lo na hih manin tua teng mah na tanu tapate’n amau hun ciangin hilh kullo-in amau mun ciatah hong zang ding uh hi.

Na Paina Lampi Mah Na Tate’n Tawn Ding Hiam?:

I paunak khatah “Sakhi a pi san a no san” a cih pen a hoihlamte ah hi mahmah napi’n a hoihlo lamte ah deihhuai hetlo zel hi. Hoihlohna lam bawlphatna dingin ‘Sakhi a pi a san hangin a no kang’ i cih theih ding kisam hi. Tua dingin nupa khat in amau nuntakna tuak limtakin kivelpha-in tua sungpan tate i zuihtheih ding leh zuih dinga hoihlote khentel dinga, a hoihlamte limtakin hansuahin a hoihlo lamte panin zong limtakin dal ding uh hi. I dal theihloh ding na tampitak a om sam hangin i dal theih ding zong tampi mah om hi. Tua dingin nupa kithutuakin innsung vaihawmkhawma, mapangkhawm thei i hih kul hi. A pa’ cih a nu’n cilo, a nu’ cih lah a pa’n thukimlo innkuan sungah tate lungam thei hi. A hoihlo zaw ahih hangin tate lungsim lam a genpih zawzaw tate in belh bawl zawpah ahih manin tua hangin nupa kikal kikak thei hi.

Nu leh pate in i zawhloh, i neihloh thute tate sinsak ding cih pen thuneu kikeuhlo hi, ahih hangin a piangmawh thu hituanlo hi. Tua bang a pian theihna dingin lungsim a khel/bawlpha thei Pasian bek tawh pankhop kul hi.  Nang nangawn in na neihloh/zawhloh na tate adingin na deihsakte a tangtun theihna dingin tua a tangtungsak thei Pasian bek ahih lam na phawk ding ahi hi. Nang’ na zawh ciangte bel nangmah etteh dingin zong na gen ngam ding hi, ahih hangin nangma zawhloh/neihlohte na tate in a etteh ding omlo ahih ciangin etteh ding hoihpen Pasian bek mah na paulap ding kisam hi. Tua ahih manin na zawhciangte bek na tate genpih kei inla, na zawhlohte dong zong na tate lamlak in, a lampi ding kawkmuh thei bek in.

Tua ahih manin nang kamkhauh/awkhauh zang mi na hih hangin na tate kamnem zat ding a hoihna genpih in, lungtom mi na hih leh lungduai dingin na pattah kei leh nangmah bangin hong lungtom gaigaih lel ding hi. A phun hat mi na hih leh lungduai a kulzia hilh zaw in. Sum zek siamlo mi na hih leh sumzek siamlohna in zawnna hong tun thei ahihna lak in. Sum leh pai enlah lua mi na hih khak leh zong sum leh pai deihluatna siatna kipatna ahih lam na tate kiangah gen ngamlah kei in. Tep leh muam khawlsan theilo/utlo mi khat na hih leh na tate in nangmah banga hong zatlohna dingin genpih bek lo-in amaute muhna ah tuabang na zatte kidawm in.

Lai pilna na neihloh hangin na tate’n lai pilna a ngahna dingin hansuah teitei inla, a thu bek tawh laisim dingin sawlsawl/taitai thapai lo zaw-in nangmah tektekin laisim dingin tutpih tangtang in. Nangma khang hun sungin na inn na lo ding gina na lamzawh kei leh zong na tate in a lamzawhna dingin lai pilna tawh nuntakna kikhelsak thei ahihlam uh muam tawntung in. Innmun logam iplaha a kekthei mi na hih leh leitang lianpi sangin pilna sangpi neih ding thupizaw ahih lam phawksak teitei in. Lai a kin/uk hetlo mi na hih khak leh zong nang hun lai sangin na tate hun ah lai pilna lo tawh bangmah piang zo nawnlo ahih thu na tate theisak inla, lai a uk theihna dingun a lampi sialsak in. Nang’ hun lai-in na laisim thadahna hangin tua huna lai a kin mahmah na khangualte tu-in na phakzawhlohna na tate in thei vivelin a hanciamna dingun hansuah in. 

Innkuanpih zi leh tate tawh kithuah sangin khualak lawmte tawh kithuah nuamsa-a hun tam a zangzaw mi na hih leh tuhun leitung khantohna tawh kituakin tuabang nuntakna in mi phaklahna ding lampi ahihna na tate telsak in. Na tate in nang banga khualakmi a suahlohna dingin nangmahmah in kithuahpih in, vakpih inla, kimawlpih in. Na tate’n nang sanga a muan zawk omlo ahih manin a muanpen pa/nu in ama lamet bangin na kithuahpih loh ciangin amah khasia khinkhian thei hi. Minam veina hangin na innsung don manlo na hih khak leh zong na tate nuntakna ding mah na lungsimah a lianpenin koih tawntung in. Minam veina hoihlo cihna ahihloh hangin tate en manlo lianga minam veina hoihlo zel hi. Pasian thu uk/hat mahmah nu leh pa na hih leh zong a hoihlua sem hi-a, ahih hangin na tate en manlo liangin Pasian min paulapa nasepnate ah kihel pen nu leh pate adingin hoihlo zel hi. Pasian in na tavuan dinga hong piakte lakpan a lian penpen khat in tate lampi man tawnsak ding leh limtaka kep ding ahi hi.

Tuhun khangnote pen nu leh pate’ neihsa lamsa a ne ding bek, a zang ding bek, leh a nopsakpih ding bek hilo a, a zong ding leh a lam ding, a pungsak ding leh a hawmkhia zo dingin kithawi hun ahi hi. Nuntakna a hamsa sak ding hilo-in, nopsakna lam ah a kikhelsak ding khangnote hi. Tuabanga a lam ding leh a phut ding khangno a pian theihna dingin naupan lai, thuhilhtheih hun lai-in nu leh pate in pantah in, amau (nu leh pa) lampi totsate limtakin en kawmin tua tungtawnin tate ading nuntakna lampi a sialsak ding kisamta hi. Na bawlphat sawm kei leh na tate in nangma sulnung teng mah hong zuizui lel dinga, na kidop/kikhel kei leh na sinsak kul hetlo-in na tate in nangma zat/hih teng mah hong zang toto lel kha ngel ding hi.

Bangteng ahizongin i hoihnate kisun peuh le’ng bangmah gengen a kul hetlo ding leh hih thului zong a kigelh kha kilkel lo ding kimlai i hoihnate sangin i hoihlohnate kisun nuamzaw citciat sese i hih mana tu-a teng a gen ihi hi.  Tua ahih manin I kidotna pen: “na tate in nang hong sun leh na lungkim takpi mah ding hiam?” cih hi. A dawnna eimah tek in i nei ding hi.

By: Dr. Pum Khan Pau (Tongsan Columnist, USA)

 

Na Khantohnop Taktak leh!

PDFPrintE-mail

Last Updated on Saturday, 11 April 2015 14:41 Written by Tongsan Admin Tuesday, 07 April 2015 19:56

 • Hong kideihsakna simmawh kei in. (hong it taktakte bekin hong deihsak uh hi).

• Thu hong kihilh ciangin heh kei in(hong deihsakte bekin thu hong hilh uh a, thu kihilhna man' lohna pen mihai hihna ahi hi).

• Thuhilhna man' siam in(Thuhilhna a mang mite mipil hi-a, a daupai ding hi).

• Kiliansak kei in(Kiliatsakna pen ei-leh-ei kineuseksekna hi. Na kiliatsak manin mite' thuhilhna thupisim loin, na mang nuam kei hi).

• Kipilsak se kei in(Mipil taktakte kipilsak ngeilo uh hi. A kipilsakte in "kei hai ing" ci-in a kipulaklak tawh kibang uh hi).

• Lungkia kei in(Lungkiatna pen guallelh ding kipatna bulpi hi).

• Kiniamkhiat in(A kiniamkhiatte Topa'n laamto hi. Na kiniamkhiatna pen na san'toh semsem nading ahi hi).

• Na gamtat luhekzia puah pha den in( Nang maan na kisak nop hangin na kicin'lohna tampi om den hi).

• Awlmawh nei loin om milmel kei in(Bangmah na awlmawh kei nate in zong nang hong awlmawh tuan lo ding ahih manin, nang mah na sumh masa lel ding hi).

• Na nuntakna sungah a thupipen(thuneipen)leh na lunggulhpen, Topa bekmah hisak den in(Amah in eite' sap teng cin'na leh deih teng kimna bulpi ahi hi).

 

By: David Tuang

 

2015 Election teh Kua Teel Ding?

PDFPrintE-mail

Last Updated on Sunday, 29 March 2015 02:44 Written by Tongsan Admin Saturday, 28 March 2015 22:16

10697381 4699586503132 18338557028296367 oThuman tak le suakta takin (free and fair) kiteelna a om theidiam cih ngaihsut huai bek-in tukum 2015 kumbei kuan teh bel kiteelna om limlim dingin ki-um tekhi. Tua ahih manin kuateel peuhmah ding cih tu pan kipan, ngiahsut kholhhuai, kigin kholh huaihi. Mipi palai (Member of Parliament) ding, kua teelding ? Bangngen sak ding ? Koi cih panpih ding cih thute kong kumnuam hi.

Kua teelding?:

Hih dotna ih ngaihsutteh a mimal le a party in ngaihsut huaihi. Party lak-ah zong gambup huam party (USDP, NLD) cih le minam huamin party (ZCD, SNLD) cihdan omhi. Tuate nih-in thakhauhna le thanemna nei ciat-uh a, hih thului sungah tam ih kikum man kei ding hi. Ngaihsut pak theihin cilehang, hlutdaw sungah a tamzawte meetang tawh thu kikhensatt a hih manin gambup huam party liante`MP te teel lehang ih thukhat peuh ong taksuak baihtheih hi. Ahi zongin tuadan partyte minam neu, biakna tuamte vai-ah dinmun muanhuai lo uhhi.

Tu lian laitak, minam dang, biakna dangte langpan nopna tawh lutol uang deuh pawlkhat thusun, namkep thukhun (race protection law) vai-ah party liante dai uhhi. Gambup huam party lian pan MP suak ih mipihte aw ih limzak keihi. Mi citawm minam neu, biakna dangte ading ahih leh ki ciangtan uhhi. Party lam enlo-in a mi-in en ding hile hang, Lai Siangtho sung a om Esther kumpi nu dan paktat huai kasa mahmah hi. Esther kumpi nu nuntakna pan paktat huai thu thum kimu theihi. Pasian a um, a ciim giugiau le a diakdiak-in mipihte ading luangkham ngam liang MP ih kisam hi.

Pasian um cihteh upna lam-ah a khiam vetlo(compromise) kulhi. Adiak in Pasian bia tawm gam, eite ading ih upna dinpih ngam ih kisam hi. Tua khitteh mipil, mi liante tawh kithuah ding ahih manin zong ong pilzek, teizek, siamzek kulhi. Esther bangin kumpite tawh koi cih kimuh-in, bang lampi tawh thu sung leng lempen dinghiam cih a thei giugiau kisam hi. A thupi mahmah khat-in mipihte phattuam nang ahih leh luangkham phial zah-in a kipia khia, a hangsan, a ngenngam ding ih kisam hi. Tuma khanglai pek a kipan tudong Zomi makai pawlkhatte ki thukhualsak lua cih, ka zamun mahmah hi. Mipihte a thukhual masak ding hun hita hi.

Bang Ngen ding?

MP ding teel-in Hlutdaw ong tung tak uhteh bang ngen ding, cihtawh kisai-in 2008 Constitution sungah state huam a tu hlutdaw le gambup huam a tu mipi palaite`n bangteng sem, van, khensat theih cihte ciantak in kikhen sitset hi. Hun la-in kan/sin huaihi, constitution kipuah lezong kanpah huaihi. State huam hlutdaw ah MP ut khat-in meetang ngah nop man-in gambup huam hlutdaw te bek khensat theih nakhat peuh kamciam ong piakkhak leh uppah loh ding thupi dinghi. A tutna mun uhtawh kiciangtan septheih na om-in, utut a ki ngen ziauziau thei hilo hi. Tua lo, MP te-in mipihte ading muibun a suah nop uh leh mipih te` dinmun, kitangsap taktak tel masak huaihi. Tua ahih man-in zum-le-hlutdaw huang sungbek ah nitum thapai lo-in, hun ngah nakleh mipihte kiang va zin, kimu, kan, thu dot zeel kulhi.

Mihingte’ dinmun tawh kisai theory lampan en lehang Maslow phuahkhiat Hierachy of Needs kici, mihingte' kisapna a dawldawl-in gualhnazangin kingaihsun theihi.

1. Dawl khatna lungsim pumpi kisapna (psychological needs) ci-in nekding, ihmutna ding le sex hi. Nekding le lu-nghak nading ciangtawh buai mahmah khin tangialte`dinmun hi.

2. Dawl nihna ah patauh tawm zawk deuhna (security needs) cih omnang khawlnang, buknang mun le cidam kikepna cianghi. Sikkang ciang bel dawhzo, cinat teh zatui leizo sam cihna dinmun ah omtehi.

3. Dawl thumna ah kizopna/neihtheihna dinmun(belonging)hi-in mite' it, paktat, maipha piak(lungsim lam kisapna) le phone, inn, mortor(muhtheih kisapna)te ah a omzote dinmun hi.

4. Dawl lina ah man neihna(esteem) cih dinmun hi-in, lungkimna ciding ihhiam, nuntakna sang zawdeuh, thu nei zawdeuh, thu-le-la pawl khatah aw thawl zaw deuh cihna hi.

5. A sang pen dawl nga na-ah bel ei-le-ei mantakin kitheih khiatna (self actualization) cih na hi-in, mi khatin suakta takin amah-le- amah ki theihkhiatna, ei-le-ei ki muhkhiatna cih hi. Patauh luatding kisap dang omlo-in, mihing manneihna taktak neihna dinmun hi.

Hih a dawldawl-in ih gen biatbuat na-in mipite` dinmun theilo pi-in a dangtawh buai masak lohding cihna hi. Thupi (important) le thukin (urgent) cihte theih huaihi. Tua dawl 5 lakpan dawl khat bek vei ding cihna zong hituan lo-in, sep khop theihteng sem, khat veivei sepdiak dingte khinkhai kulhi. Lai Siangtho sungah Esau in a gilkial lua mahmah ahih manin be meh kuang khattawh a innluah za khekngam ekhi. Upman hi masa lo-in gilkial dangtak man-in biakna dangte` ukna nuai-ah a va lutngiau ih Zomi pih honpi khat omta hi.

Tu hunteh Zomite gam tuamtuam ah kithehthang ta ahih man-in, Zomi makai (politic, biakna) a kici peuhmah in gamsung gampua a om mipih khempeuh a huam theipen (inclusive) in ngaihsut hun hita hi. Myanmar kumpi zum-ah tu ka hihteh gamsung a om Zomite` awbek ngai ning ki cithei nawnlo-hi. Tua bangmah-in gamtuamtuam zat (international standard) bek tawh Myanmar gamvai kiteh khawm thei den lohi. Myanmar gam cihmawk pen `Kawl mangpa thugen akpi in phiatnelh` ihcih danhi.

Palaite' ading Palai:

Democracy ki-ukna ah MP cih pen mipite` sawltak a hihi. Mipil mahmah Noam Chomsky kiang, banghangin politic semte zuaukhem theidiak uhhiam?, cih a kidot leh, en amau ki khemkhem sak hive hang. A taktak en politician te uktheihna thuneihna a neilua hihang, ih zatloh manbek hi, cihsan hi. Mihing limlim sum-le-pai, min-le-za neile hang khua ki phawklo theihi. Hih munah mipihte haksatna Esther kumpi nu kiang a va zasak, a va lok, a va phawng, a va to Modecai dan ih kisam hi. Modecai pen tuhun kammal tawh advocacy sempa kici theihi.

Mipite` deih-le-ki tangsapte, patauh-le-lungkhamnate kumpi sungah om MP le minister(vuanzi) semte`n a zak, theih nang uh, thu va gen, ngen, lok, to ding mipi lampan kipawlna tuamtuam ih kisam hi. A cidam democracy ki-ukna gam-ah, kumpite bek thupi khinlo hi. Kumpi(government), sum bawlte(business) te le mipi kipawlna (civil society) te` thupitna kikim linlian in, a thupi zawsang, omlo hi. Mipi kipawlna ah GZA, TA, TYF, Tongsan Media, Tedim Post, Zingsol, Zomi Daily, Zonet, Siamsin, CNRW, ECODS, ZYA, Tedim Khua Upate cih akipan om ngeingai a, democracy kician neihtheih nadingin amau tung zong kinga veve hi.

Mipi kipawlnate thanem le kumpi le sumbawlte’n amau hamphatnang bek sem thei uha, mipi kipawlna le kumpite kia sepkhopna tawh sum-le-pai khantohna kingah theilo dinghi. Kumpite citak keileh lah bangmah kisem theilo ding hi. Hi theileh hlutdaw tawlngak sim-in MP teelte tutpihna kinei den henla, hlutdaw kahsung bangteng va sem, va ngen, va thukim, va nial cihte a kipan MP ding kidem lai-in bang kamciam pia, tun tuate koicih tangtut, bang haksatnate tuak, bangteng ong ngahkhia cihte ki pulak sak huaihi. Amau ong sawmkei leh mipi kipawlna lampan patkhiat huaihi.

Media te`n interview zeel-in a hi bangbang, leitung mun tuamtuam ah zaksak kikkul hamtang hi. A haksat nate uh huh theih a omleh huh, panpih, pahtawi-in, thungetsak in thupha zong piakpiakding himai hi. Kiteelna cih zenzen pen kung(goal) hi zenzen lo-in a khualzinna kipatna hipan zaw-in zuih tohtoh ding process sau mahmah hi. Tua ahih manin mi kician mah teel-in, ih kisap te mah ngetthapaih ding hi-in, gamnuam gamhoih lam nading mikim-in vaipuak nei ih hih lam phawkden ciatni.

By: Pau Sian Lian (Tongsan Columnist, Japan)

 

 
Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 94

Warning: Illegal string offset 'active' in /home/tongsan/public_html/archive/templates/TONGSAN/html/pagination.php on line 100

Page 3 of 220

TONGSAN Video

TONGSAN Photo Gallery

TONGSAN Weekly Journal

Who's Online

We have 320 guests online
Joomla Templates and Joomla Extensions by ZooTemplate.com