zomi aw lung lau ken!

ARTICLES Interview Pu Chin Sian Thang tawh Holimna (Interview)
BLUE GREY RED

Pu Chin Sian Thang tawh Holimna (Interview)

PDFPrintE-mail

Malaysia gam Kualalumpur khuapi a kibawl 65th Zomi Nampi Ni (Zomi National Day 2013) ni ah thugenpi ding akisam (Invite) ahi Zomi makaipi Pu Chin Sian Thang le Malaysia a om Zomi makaite in Febraury 18,2013 ni- in Chinese Assembly Hall sungah (1:00-6:00PM) sung gam le ZAM makihna tawh minam vai Holimna (Interview) nei uh hi.
 
Tua laiah ZAM President sya Paupi in hun makaih in, Kalaymyo pan apai ZBCM- Kalay Baptist Church Pastor Rev. En Khan Hau (Sia Haupu) zong kihel thei hi. Sia Haupu in zong hun tomno akipiakna sungah  tomkim takin minam a itzia leh minam ading a malaknate pulak khia in, tha kingah thei mahmah hi. ZAM Makaite lam pan Pu Chin Sian Thang tungah telloh thu leh theihnopte dotna le dawnna (Q/A) hun limcitak kinei-in, Pu Chin Sian Thang in a dawnkiknate kei phawk khak sun teng tomkim cingin anuai ah hong gelhkhia ing. Akician zawin ZAM ten hong pulak kik dingin ka lamen hi. 
(By: Lamthang- Zomi Quavadis)
 
Pu Chin Sian Thang Dotna: Zomi le Chin min vai tawh kisai na muhna nong gen thei diam?
 
Pu CST: Zomi leh Chin vai tawh kisai-in, Zomi cih min pen ei sunga laigelh mipilten' tangtawng pek a kipan i ngahsa hi' ci uh hi. Piteekpu gelh laibu " Freedom from fear"  sungah zong Zomi ih hihna kidawk a, kawl kumpi inzong zanmah in Zomi ciin hong ciamteh ta hi. Tuabek hi lo Zomi cih pen Pasian in a tuam vilvel a hong piak ahihna tawh kizuiin thupha kipia a ZBC sunga Pastor masaten thungetna tawh a kipsak sa min a hihi.  Tua ahihman in Chin a kici veve laite pen Pasian thu anial, thuman a nawlkhinte cihna hi.
 
Chin minpen ih nunglam pan a tello pawlkhatte hong sapna bek ahihi. Ih tenna Chin State ahih hangin a sunga omte Chin minam a kici nuam ki om lo hi. Zomi ahih keileh leh Laimi na kici zaw uh hi. ZBC min pen CBC tawh laih ding cihthu ah zong a tamzaw thukim lo khin uh hi. "Zomi sungah Falam leh Khalkhate zong ih hel diam cih dotna pen " Amau lakah a ut het lo pawlkhat a om uh hangin Zomi ahihna uh bei tuan lo hi. Zomi vive ih hihi. Zomi cihpen ih minam min dinga Pasian hong piak ahihmanin ki taisan thei lo hi. Zi leh ta leh pawlpi kitaisan thei, ahizong Minam ki taisan thei lo hi." ci hi. Namdang thau tawite bangin ei Zomiten zong thau man lehang Kumpi tungpan ih deih ih ngah baih zaw in na um hiam a kicih ciangin hibangin dawng hi. "Tawmna leilei Zomi leh Chin cih tawh kipum khat thei lo lailai hanga ei thau tawina in bangmah lok lo ding hi. ZCD in kam tawh a kigen theih laiteng gengen dinga, thatang suang lo ding cihpen a ngimnate laka khat ahihi..." ci hi.
 
Dotna : ZCD leh ZNC vai kilaihna tomkim nong gen thei diam?
 
Pu CST : ZCD le ZNC tawh kisai-in, "Kumpi'n ZNC hong sanzawh loh ciangin ZCD tawh a kikhel hi. ZCD ngimna bulpi 4te lakah Zomi hihna nusia lo ding, Zomiten Zogam ah thuneihna nei ding(federal state) cih thu nihte zong kihel hi." cihi.
 
Dotna: Gullu mual tawh kisai ZCD party i malakna le ngaihsutna nong genthei diam?
Pu CST:  Gullu mual vai tawh kisai " Eimi pawl khat in hong kuppih mah uh hi. Ei gam sunga om Gullu mual pen kumpite'n Sagaing huam sungah koih ding geelna nei hi. Thu khatah Zogam pen ei gam hi i cih hangin Kumpi upadi in leitang tungah thuneih theihna hong pia lo mawk hi. Kawlgam sung mundangte ah zong hibang thu om a, gammite'n khaktan sawm taleh lawhcing lo uh hi. Hih thu hangin ZCD ngimna bulpi Federal state i cih pen hong thupi semsem hi..." ci hi.
 
Dotna: Zogam ah Zomiten kumpi sangte ah Zolai kisin thei ta ding akici pen ahimah hiam?
Pu CST: Hih tawh kisai ah, "kawlmang thu akpi'n phiatnelh" a cih hong bang zel diam cih dotna pen " A thu in bel kici mah ei. Ih telnop leh Kawlgam ah sang kihong ta ding hiven, tun zong dot theih pah hi. Kawlmang thu Akpi in a na phiatnelh khin mawk mah tam thei keng.
 
Dotna : Zomite pen Israel minam khat hi takpi in na um hiam? 
 
Pu CST : Hih thu ah gen theih tam nei keng. Israel milian khat in a inn ah hong khawlpih in hih bangin hong genngei hi." No Zomite pen Israelte tawh na kibatna uh tampite lakah thu nihte pen lianpha deuh hi. Khatna-ah no sungah na kilem theih lohna uleh pumkhat na suahtheih lohna uh pen a khatna hi. Ko, Israelte zong tua bang mah hi ungh. A nihna ah tenna dinga Mualdawn tuai na telzawkna uh ahi hi. Ko Israelte zong zanggamte sangin mualdawn ah a tamzaw na teng ngei hi ungh. Ahi zong Israel minam taktak a kong pom zawh lohna uh pen no Zomite pen kote banga pilna siamna lam hitaleh hauhna lamah hita leh mitung tuanna, leitungah kidawk khiat zawhna na nei kei uh hi. Israel minam hi takpi le uh cin Pasian in hitan vei hong selciplo ding hi" cih thu hong gen hi. Hih thu tawh kisai tuateng bek hong gen thei ingh." ci hi.
 
Dotna:  Ko,Malaysia a omte nong bangci muh hiam? Bang thu hong vaikhak nuam na hiam? Gam thumna i lunggulhna pen thupha hi-in na ummawh hiam?
 
Pu CST: No Malaysia a omte kuakua na hi uh zongin Zomi vive mah in hong mu ingh. Zomi na hihna uh mangngilh kon la, taisan ngei kei un. Chin kicihna tawh na gam thumna cih uh a tung baihzaw ding na hiphial zongun Zomi mah na kici teitei un. Pasian in hun asak ciangin na utna uh hong lawhcing sak veve ding hi. Pasianin thumaan bek deih hi. Chin min tawh gam thumna tung khinsa Zomite zong na tuntunna vuah Zomi mah hong kici kik un. Gam thumna lunggulhna pen keima mimal ngaihsutna ah Thupha hi na ci ingh.
 
Israel mite zong gam tampi ah Pasian in na khenthang masa hi. A omna gamte ah apil pen, a haupen leh a siam pente na hi uh a, Israel gam hong ciah kik uciangin tua pilna leh hauhna tetawh a gam uh hici bangin hong puah uh hi. Zomite aw pilna sangpi hong sin un, ong hau unla Zogam leh Zomite hong zuun un. Zogam a om Zomi khempeuh no gam danga omte tungah hong kinga hi cih mangngilh kei un. Zogam ah hong ciahkik un....ZOMI na kici tawntung un,bang hang hiam cileh Zomi cihpen Pasian in ei min dinga hong piak hi a, Pasian mi masaten thungetna tawh a kipsak sa min a hihi."
 
A kaikhawm kik,
 
By: Lam Thang (Zomi Quavadis)
 

 

 

Comments/Ngaihsutnate (8)add comment
...
written by csmung , April 29, 2013

guai ai om na tek pan ai gam bang cih khan toh ding cih bek ngaih sun leng ut in
ai lung sim tek ah ka ten na gam in kei bang hong pia thei ding cih ngaih sun lo zaw in ken ka ten na gam bang ka pia thei tam maw cih ngaih sut huai sa ing nang na ten na gam puah ma sa le cin na ten na gam in zong nang hong [puah kik kha ding in ka um hi

report abuse
vote down
vote up

Votes: +1

...
written by Peter Thangpi , April 23, 2013

tawm na lei2 ki leh kaih2 mawk ding maw lawm, nang lak ding kha lo mawk aa, Zogam leh Zomi a ding,ngaih sut na hun na nei zel2 ni teh maw, hih zah aa Zogam leh Zomi a vei khat na om khak pen naum lah nuam hang, dah lah hang ei maw taw lawm.
report abuse
vote down
vote up

Votes: -1

...
written by csmung , April 19, 2013

Zomi leh Chin vai ah a min tawh buai ma sa zaw lo in koi cih khan toh ding cih ngaih sun ma sa leng hoih sa ing
Zomi hi keng a ci te leh Pasian a nial hi kei in Chin a ci te leh zo mi hi keng a ci hi peuh mah lo hi
a min tawh ai buai lai leh bel cik cing ai khang to tam
mio tawm na leilei hih c leh z tawh ki tel khilh na hong om ding in mi mal ai tawmtawm tawh nih aa ki khen ding cih ka ngaih sut ciang na sa mahmah ing
mailam ciang min tawh ai buai sang koi cih khan toh ding cih ngaih sun leng hoih sa ing

report abuse
vote down
vote up

Votes: -1

...
written by Zomi , February 23, 2013

Thu kitheisak a, kipil sak a tang kheh ngam na hih uleh kipan vevua, mail sunga puak bakbak a pauna lel tawh Zogam ngah zo mawk ding maw...Ih hih theihna tekah pang ni ei, kuamah a kikhaktan om lo hi..Inn leh lo nusia a , bangmah lo tawh Zogam ading kum 24 val a sem khia Puthang mawk gensiat ding hisa keng
report abuse
vote down
vote up

Votes: +2

...
written by Tg. ZO , February 21, 2013

ISRAEL te MOSSAD, USA te CIA cih dang ZOMI sungah zong om/nei in ( written by pilvang-ni ) te pawl2 a om na2 ah zongin,
kanin thatlump ding hoih sa ing....

report abuse
vote down
vote up

Votes: +0

...
written by khup pi , February 21, 2013

kei ngaihsutna ah 'A thu a gen ding ahoih peng hi, a tawpna ah a ki sap leh zong thau tawi bek hilo kap gawp ding hi lai.......
ahihang (Ui-eek chin sian thang, uitalte ektum tampi na muamkha khin ta hi maw. ) hih bang a comment piak pen MIGINALO/MIPOI
Nu leh Pa thuhilhloh te gen ding bek a ka ngaihsung hi.

report abuse
vote down
vote up

Votes: +1

...
written by minam , February 21, 2013

a thu a zong gen ding ahoih pen hi, ahihang thau tawi ding a ki sap leh zong tawi bek hilo kap lai ding hi. comments i piak ciang nang hoih sakna/ngaihsutna bek pia ding hoih sa ing. makai 1 atung a comment bang a gensiat ding ki lawm sa keng, nang leh nang bang ci mi Nu leh Pa thu hilh loh mi ong ki cih ding ong deih sak keng...
report abuse
vote down
vote up

Votes: +1

...
written by pilvang-ni , February 21, 2013

"Tawmna leilei Zomi leh Chin cih tawh kipum khat thei lo lailai hanga ei thau tawina in bangmah lok lo ding hi. ZCD in kam tawh a kigen theih laiteng gengen dinga, thatang suang lo ding cihpen a ngimnate laka khat ahihi..." ci hi.

Atunga banga aphengham pen Chin tawh kituahlohna pen ama hang hilo maw? tua banah thautawitte khong kipilsak tak a, judgement apiak mawkmawk,

Ui-eek chin sian thang, uitalte ektum tampi na muamkha khin ta hi maw.

report abuse
vote down
vote up

Votes: -1


Write comment/Na ngaihsutna gelh in
smaller | bigger
password
 

busy

TONGSAN Video

TONGSAN Photo Gallery

TONGSAN Weekly Journal

Who's Online

We have 104 guests online
Joomla Templates and Joomla Extensions by ZooTemplate.com