zomi aw lung lau ken!

ARTICLES Interview Pu Zokhup (President of WZC) Tawh Holimna
BLUE GREY RED

Pu Zokhup (President of WZC) Tawh Holimna

PDFPrintE-mail

DSCI0136

Tongsan Media Group in Zomi sungah maikai muanhuai i neihte tawh Holimpihna kineithei zela, tu'n zong Pu Zokhup (President of WZC) le Openzosuan te Holimna a nuai abang in kong suahkhia sawn uh hi.

Openzosuan:  '' Manlah kawmkal pan hun nong piak theih lungdam mahmah in, openzosuan min tawh kipahna le lungdamna thu ong pulak masa ung.''

Pu Zokhup:  ''Kei zong nuam sem ing ei.

Openzosuan:  '' Pasian hehpihna hang in dam ni teh maw? Zozum/WZC website te ah kicing tak in thu leh la na suaksak khin vua, tel beh tohtoh nang in holimna ong nei beh nuam ka hi uh hi.''

Pu Zokhup:  ''Kei zong mipi teltheih semsemna ding pen ka lunggulh le ka ut khat ahihi.''

Openzosuan:  '' Zomi cih in leitungbup akizel Zomi khempeuh huam hi lo hiam? World Zomi Congress ci in (leitung/leitungbup) cih bang hang in kihel veve ahia?''

Pu Zokhup:  '' Zomi pen leilu pan leitaw ahuam himah hi.  Tua a huamna lian mah, muhtheih le lah theih dinga, ataktak a lahkhiatna in, World Zomi Congress ci a, kiminvawh pah ahihi. Ahuamna lahna limlak hipah hi. Israel te'n zong Zionist vive hikhin napi uh, World Zionist Organisation- WZO ci in, a min vawh sese uh hi. New York ah headquaters phut in, Indepence angah zawh uh ciang , Jerusalem ah tuah uh hi. Amau etteh cihbang hipah samlo hi. Taiwan suahtakna sual te'n zong, World Formusans for Independence na ci in, min nei uh ahihi.''

Openzosuan:  ''WZC ii lungtup, The Second Independence Movement pen I biak Pasian awi na hang in i ngah khit zawh ciang WZC ii lunggulh kicing hita aa, nasep mapan na te khawlding maw, ngimna (laih in) a dang khat tawh kalsuan toto zaw ding ahiam?''

Pu Zokhup:  ''Zomi independence pen Pasian awina tawh kingah ding ahihi. Banghang hiam ci le, Zogam pen Asia Christian Corrider ( kei phuahtawm hi) ah om i hihi. Asia continent enleng, Zogam pen Communist, Hindu, Buddhist, Muslim le biakna adang tuamtuamte laizang ah om ih hihi. Tua Christian Corrider kacih pen, Zogam, Nagalim, Manipur Hills Kachin gam teng pen, Indian tuipi pan kuuito ngieungeu ahihi. Hih na mitkha ah bawl lecin, Asiabup a, khamangthang le Zeisu thei nailote khawvak piakna phualpi dinga , Pasian in ong tel hi ding in, ka up ahihi. Tua ahihmanin, Pasian in, Zogam Independence hong piak khit ciang, Zogam pen gupkhiatna thu tangko nang phualpi in, Pasian in zang nuam a hi, cih pen ka upna uh ahihi. Tu in, unau Naga te'n Nagalim for Christ ci in, Khasiangtho lamlahna tawh, takkheh ci a, athasan lai tak uh ahihi. Zomi le Zogam bek in, i sep ding kisam lai ahihi.

Independence i ngah khit ciang in, WZC pen kiphiat lo ding ahihi. Zogam i cih pen gam thak i hih ban ah, gam lian lualo i hihmanin, Zogam security dinmun pen delthawng zel thei ahihi. Tua ahihmanin, leitungbupi a om Zomite le, gamtuamtuam te tawh ki tanauna le, pankhawmna kisam den ding ahihmanin, Independence ngah zawh ciang, Headquaters Zogam ah tuah a, leitungbup ah kiptak a, i dinsuak ding kisam ahihi. Tua ahihmanin, nong dotna uh ahi, WZC omlai ding maw? cih tawh kisai in, Zomi le Zogam in, kisam asaktan om ding ahi, ci in, kong dawng nuam hi.''

Openzosuan:  ''WZC pen ZRO leh ZNC tawh Trinity cih zah dong in ong ki mu aa, ZRO dan (ahih kei leh) ZNC dan mah in a thuak/sum/bai ngam taktak kipawl na adang ong om leh support piak ding cih mah hi veve ahihiam?''

Pu Zokhup:  ''ZRO, ZNC, WZC a kipan, pawl le party tuamtuamte pen, Zomi makhualna ( Zomi Interest ) vive a kibawl ahihmanin, Zomi Interest a ding ahun le amun in, hong phut le, apiang theilo bang mah omlo ahihi. Hihmun ah WZC tawh kisai gen leng, WZC in bel Burma in Democracy le Federal Constitution i ngah/inei ahi phial zong in, tua pen um pah lo ka hi uh hi, bang hanghiam cih le, i sanggam Burmese te pen tangthu ah enleng, khuttung lumleh abang dente uh ahihi. Tua ahihmanin, WZC kalsuanzia pen paitang suak lai veve ding ahihi.''

Openzosuan:  ''Zomi sung ah Z min hi ta leh hi ta kei leh gam leh nam aa ding kipawl na tuamtuam om na lak ah na ki hel ngei na leh, na ki hel lai tak na a dang a om hiam?''

Pu Zokhup: ''Zomi le mindang tawh kihelna bel om ngei kawikawi mah cih ding hi. Tuate pen;

(a) Mandalay a Zomi bup sangnaupang kipawlna Chin Literature and Culture Committe- CLCC ah term nih kizom in, Literature Committe ah incharge sem ing, tua sung in, Chin Magazine 1994-5 le Zingsol Magazine-1996, makaite le mipi panpihna tawh kihawmkhiazo cih ding hi. Tualo in Zalat Ni cih laihawm zong lawmte tawh phuankhia in, kawllai in hawm khia ngei ung. Kei bel laisim(sanglai kihello) bel uuk in, lailam ukngiat bel hilo hing, suaktakna lam nasep, a sawm ngiat khat kihi in, lailam tawh kisawhkha lo theilo ahihman a, abual kha hi zaw ing. CLCC le Zomi Siamsin ah lailam vaipua in kihel ngei cih ding hilo dia.

(b) Tualo bel Pu Thang Za Tuan makaih, 1998 Zomi Nam Ni a Golden Jubilee Committe le magazine ah, lailam committee ah, member no khat in, pang ngei ing.

(c) ZNC tawh bel kisawhkha ngei lua keng, kisai khakna a om sun khat bel, 1997 hiam khat , Zomi Nam Ni a ding, Aung San Suu Kyi makaih NLD te'n, Zomi National Day message hong khak nuam in, Zomi tawh kisai, amau etding lai khat hong gelh un, ci in Pu Chin Sian Thang, Pu Gin Kam Lian te'n, Ciimnuai magazine makai Pu Vung Lian Mang vaikhak hihtuak hi, Pu Vung Lian Mang in, nang hong gelh dih o, ci in, kagelh hiven, azang uh hiam, zanglo uh hiam thei keng, kanung ngaihsut kik ciang, keigelh pen background history hiphalo in, Zomite khasiatna, hehna le thangpaihna teng, facts taktak zong hilualo peuh kigelhkha na hizaw mawk hi.

Tualo bel Khatvei 33th street hiam khat ah, Pu Gin Kam Lian in, hongpai pih in, Chin Magazine NLD palai nih kiangah present in kapia uh hi. Tua mun a, lung hong phawng khat bel, tua NLD palaite 2 pen University a lecturer sem ngei hi in, NLD support man vua kitawp sak hi, ci in, Pu Gin Kam Lian in hong gen hi. Limtak zong kiho pih ngam mello hi. MI(thu kan) te alau hizen ing. Ka nung ngaihsun ciang in, Kawl, Shan, Kachin, Karen le minam dangte pen Doctor, Engineer, mihauta, ulian ta a kipan, gam le minam a ding, semkhia ziahziah in, liam le bai, sih le nat thuak keei uh in, ei Zomite pen apil tata meidawi in, bucip manga, Matric B tawh pass ciang lel khong nangawn, pammaih kisa mahmah deep cih pen, dik kasa thei hetkei hi. nang e le? ci in, kaki sittel ciang in, ih zum tha bang hong suak san kei mawh hi.

Bangmah manna mel omlo B.A khat sin leltak,Burma Army diklo cih thei gegu a, a bang hi pepeuh na hiam? pammaih na kisak keei pong na? kaki ci phing hi. Piangthakte pau le, " Ka bil hong puak lek" ahihi. Tua tha mah tawh 1998 ciang National Day bawlna ah, 1997 kum banga, hong kham kik peuhmah uh le, Sule Pagoda lamkabom ah, demonstration nei ding, hong kimat le kimat, ci in mi 15 bang kaki thutuakzo nong uh hi. Kamphatna ci ding ih hiam? 1998 Zomi Nam Ni pen, hong kham ngamlo uh ahihi. Cih ciang khong hi, ZNC tawh them khong kisai ngei khakna le, tua hunlai a, khangno khat hihna tawh, haihang ci ding i hiam? panla ngei ci ding i hiam, no khensat zaw un.

(d) 1998 Zomi Nam Ni zawh ciang in, Pu Khai Za Song, Pu Thang Lian Pau ( Tonzang Mipi Palai-MP), te tawh semkhawm ding in, khangno 50 kim tawh kuan in, tua lai ah, kum 7 semkhawm ung. Tua zawh ciang kumkhat sung Pu Romeo Hangzo, Pu Siam Chin Thang tawh " The Zoland Times" phuankhia in, English tawh hawmkhia ung. Manipur mualmite lak ah English Journal omsun ahihi. Ken bel a publisher le ownner sem hibek ing. Lawmte nih English siam mahmah in, amau gelh vive hizaw hi. ZLT cih loh Kuki, Nagate nangawn in, English Journal nei zolo uh ahihi. ZLT zong atawpna ciang dangka hong bei in, kikhawl cih ding hi.

(e) 2006 in New Delhi ah kisuanto in, hamsatna tawh lawmnu in, UNHCR nasiau in, kum 2 val khong ciang, tua siksan in, UNHCR in USA ah hong lawnkhia ahihmanin, 2008 December pan tuni tan USA ah ka innkuan un kibusa phot ung. Hibang kawmkal ah 2010 July kha in, Zogam saltang vai awlmawh Zomi khenkhat in, Zomi le Zogam maban vai, i genkhawm ding ci in, online meeting nei ding in, hong sam uh a, kava pai le meeting hong conduct sak in, kakikum ngeingai uh hi. A kalkik ciang, Zozum i kici ding in, hun ukpu in Chairperson hong semsuak hen ci in, ka ngawng ah chairperson vaipuak Zogam Sial Longpi hong awksak uh ahihi. Zozum pen anung ciangin, World Zomi Congress-WZC cih min kikikpsak hi. Tua hun a kipan tuni tan, WZC ah Zomi le Zogam a ding semkhawm, bawlkhawm thei omsun te, semkhawm bawl khawm ding, ci in, kana kihel ahihi. Tuateng khong hinteh, kaki helkhakna. Zogam khualzinna ah khatvei le za (Position) bang lian veva zel, khatvei le neulua kisa awmtal bawkvak zel, cih ciang khong hi ei guai!''

Openzosuan:  ''Hi bang aa kipawl na leh Media tuamtuam ong om pen ahoih lam leh ahoih lo lam % in koi a tam zaw tam?''

Pu Zokhup:  ''Zomi sungah kipawl na le media tuamtuam hong om khia zungzung pen alungdam huai mahmah ahihi. Tuni a Zomi le leitung in deih hang , ut hang ci a, i kikoko pih Democracy i cih pen, i sittel ciang Liberal Democracy na himawk ahihi. Democracy i cih pen letkhiana atuamtuam om ahihi. Kawlgam mite i lungsim atamzaw socialist democracy in hong deepcip ahihi. Burmese Way to Socialism ci in, kum 20 val Kawlte'n hong paipih ngei uh a, tua BWTS ah miteng in Burma Socialist Programme Party-BSPP party lut a, BSPP makaite cih bangbang dik in khial ta le zong, kizui nuainuai ahihi. Tua banga Party khat a kiguangkhawm a, kibawngtalzuih pen BSPP le apu uh Burma Army upna ahihi. Leitung a socioalist le communist gamkhempeuh ah zong unity ki thutuahna acih uh pen, tua bang in letkhia khia uh ahihi.Leftistte uk na gam ahilo, dictator gamte ah kumpi semte pen siahuai in pha taleh, mipi te'n va bawngtal zuihna pen , kithutuahna daan in kizang ahihi.

Tua ahihmanin, Pawlkhat party khat, makai khat a ki nga a, ki bawgtal zuih na pen communist, socialist, fascist le dictator te kithutuahna ahihi. Mizawng te suahtak nang, gam le lei kitamkham loh nang cih khong paulap in, mipite kaikhawm uh a, ahizong in,mi khutkuak khat zahte i phattuamna bek tun ahihman in, asawt ciang in, mipi te'n deihlo in, leitungbup ah lumlet uh cih i theih ciat ahihi. Liberal Democracy ah bel, ngaihsunna kibanglo, mimal, pawl tuamtuam te'n ei hoihsak tek tangpi tangta kiangah luikhia a, mipi tamzaw hupzo ten, vaihawmna len uh hi. Pluralism thupi sak uh hi. Mikhat party khat or milom khat in tangpi tangta talkaih cih bang om theilo ahihi. Paak huan sunga pak tuamtuam paak tawh kibang ahihi.

Tua hihmanin, Democracy pen Independence gam in ding taleng, Federal gam in, ding taleng deihciat i hihmanin, Zomi sunga pawl tuamtuam hong om pen lamdang sak ding bang mah omlo hi.Pawl tampi hong piangpiang dinga, khenkhat ahunzui a, hong mangmang lel ding hi, khenkhat hong nungta suak dinga, Zomi kipawlna muanhuai kihau toto ding ahihi. Zomi Democracy paakhuan ah, paak namkim hong paak ciang, Zogam hongpallun kici thei pan ding ahihi. Ahizongin akidawphuai khat ah, tulai Zomi pawl i phuan daan bel "Khawta tuukpen suih" peuh i bang luailuai kha thei mawk hi. Ball kikhukna ah team bup in ah hon delh luailuai thei hihang. Tua pen hoihlo hi, aawngna pan i gal te'n kung hong khum ziauziau thei uh ahihi.

Ka cihnopna ah, khat in pawl phuan le adang te'n zong phuan luailuai pong in, tup le ngim, sep le bawl kithuap vive hi ni loh hi. Zomi sunga i neih nailoh human righs, development, gender, translation, science a kipan, subject le issue base a sem ding adil aha a om ahihi. Human rights bekbek enleng zong right to food, right to water, right to education cih bangin simzawhlo in, i panlak ding om ahihi.

Politics pawl khat kiphuan le, Zomi akici khempeuh in, politic pawl phuan pah sawm ngeingai pong, semsuak tinten nuam i hiam? cih lah kisittelo cih bang kitam hi. Nidang in galkap hoih, sikkang inn kilamzo ci in, khang nih mahmah galkap kilut henhan hi. Tua zawh ciang in, kumpi nasem hoih kici leuleu in, khangkhat kisem henhan leuleu hi, tua zawh ciang in, laisiangtho sangkah a, biakna phuan hong laaang leuleu in, tua zawh ciang lampi tuamtuam tawn a gamdang a, kuli kuan hoih ci in, i kiphuzuazua ahihi. Tua bang a, khawta tuukpeng kimawl lunglung i hihmanin, Namdang te'n Chin Ahh (chin hai, chin mawl) hong ci uh ahihi. Kawl paunak ah " Chin Ahh Gyi, Kyaw Khyah Hmah Damiah Hman Tih" ciliang uh hi. " Zohai Zomawl, deklam tuktum gal suak ciang, khawnungpil " ci in khia leng kinai pen in um ing.

Abeisa hun ah, bang thuthuteng om hi ta leh, ei khang pen, ei khutsungah om ahihmanin, Zomi masawn theih nang, i hih theih bangbang, i omna munmun pan, i hih theih lampi ciat tawh, ma i lak ngeingai ding kei bangin, hoih sa zaw ka hihi. A thu kithuap metmat kei henla, thulu tuamtuam akim theithei in semleng, ka cihna ahihi.''

Openzosuan:  ''WZC pen Zomi asang zonai lo laizom te tawh ki zop na aom hia? Namdang te tawh ae leh?''

Pu Zokhup: ''WZC pen pawl tuamtuam tawh kizom ding, kisawm masalo a, ahi zongin akisapna zui in mai lamah kizoppih theih omte tawh bel kisawm mah hi. WZC pen apawlmite le Zomi muanga kipan khia ahih manin, (1) Pawlpi kip le kho nang ma kila masa zaw phot ding hi. (2). Zomi sung vaituamtuam ah mumal mello a, sial ek den keek i batna le vaihawm ding omlo tagah lubawk banga i omnate, huai khawm kik ding ngimna kinei phot ahihi. Tua foundation teng akip ciang bekin, adang kingaihsun pan ding hi. Banghang hiam cih leh, experince tampi kineita in, amah le amah bangkim kisik ( pilna, hauhna a kipan) te bek mah, pawl khawsuak ahihi. Leitung kipawlna tuamtuam ah, a mi cinsak na lel a, kihel kawikawi, minam dang gamdangte kianga, khutdawh ngen nuam bek, niinbung kipawlna tam mahmah hi.

WZC in ahih le ipsung sawk masa a, tua khit ciangin Zomi mipi kimanawh sawm pan ahihi. Anunung pen ah, WZC le Zomi mipi zawh mahmah loh ding vaite bekah, apualam kikonlawh sawm hi. Burma democracy movement enleng United Front pi 4 om in, a 4 a pawl kihel atamzaw kibang vive ahihi. Makai khenkhat in NGO te kianga sum duh bek a, kiphuan zong tam mahmah hi. Burma tawh kisai activist lak ah paunak khat om hi, tua pen " Kawlte mi 2 aphak uh le pawl thum in kitam ding uh" cih ahihi. Hi bang ningneng ahihmanin, alliance le united front tuamtuam a, kihel ding pen kipilvang mahmah ding ahihi.Foreign policy ah bel Zomi suahtakna hong panpih nuam peuhmah kingai ahihi. WZC pen lobby ci a, mite kiangah kizuakzuaklo dinga, nasepna activities tawh mite phawk le awlmawh ding in kipai sawm zaw ahihi.''

Openzosuan:  ''Gam leh nam aa ding Pu. Cin Sian Thang zah mah in alamdang phial zah dong a, na ong sem adang khat ong om leh ZIHA cih min mah tawh pahtawina piak ding mah ahi thei tam?''

Pu Zokhup:  ''Pu Chin Sian Thang bek ZIHA piak ding cih thu om zenzen lo hi. Amah banga piaktak ding mailam ah tampi hong omlai ding pen, WZC lunggulhpi khat hi. 1948 tungtang ah zong piaktak tampi mah om hi, ahizong in, kikhahsuah kik ahihmanin, ngahkik nang a makai Pu Chin Sian Thang kipia phot ahihi. I Ngahkik ciang in, Pu Zo khang a kipan, Zomi suahtakna ngah nang asual khempeuh, alompi a ZIHA piak theih ding hun, kingaklah mahmah hi. Kawl te'n zong Lutlatye Mawkunwun ci in, first class, second class, third class bang a, khen deep uh hiven, en zong tua sang thupi zaw in, bawl ding hihang mailam ah.''

Openzosuan:  ''CNF te' dialkhai (flag) vai tawh ki sai thu tawm na muh na nong gen thei diam? ''

Pu Zokhup:  ''CNF flag tawh kisai bel, amau hoih sa mahmah a, mipi lak ah hong zuak uh hiding ahihciang, mipi tungah kinga sa ing. Ahizong in, flag tunga ganhing tuang bel,WZC bang in kideihlo ahihi. Ganhing mai a, valukun keei ding pen hamsa kisa hi. Australia te'n zong Sanaupua ( Kangaroo) koih ngel ven, amau thuthu bel hi bilbel lel e. Hih thu nong dot dihdih le, Zomi/Chin gam flag tawh kisai genkhawmna khat om ngei mah hi. 2004 kum Chin National Assembly ah, Pu Lian Hmung Sakhong thugen hun ah, Pu Lian Hmung in, hall a ZRO lan kizang pen hong kawk in, hi flag pen Zomi/Chin Flag ding in hoihsa ing, hih singlamteh limbek mah ah kithutuahna om mate ci hi, khenkhat in zong hi sa ngeingai pong hi.

Ahizongin CNF pan Major Solomon hong ding in, ko zong ni dangin, singlamteh lim flag ah, kakoih uh leh, nong mawhsak ngeingai vevua, tu'n ZRO a singlamteh tuang pen, Zomi flag ding nong cih san uh, ci in complaint bawl ahihi. Lian Hmung thugenna, Solomon thugenna le ZRO flag te enleng Flag a singlamteh tuang pen, Zomi te'n kideih mahmah cih kimukhia hi.Kei mimal muhna ah bel flag a singlamteh tuang sak vet vanglak ih hih le, ZRO flag a singlamteh suangnuam buang, suangngamlo buanga, suahsak kiaukuau sang in, avekin suakvet le hoihsa ing. Tua mah bang in, CNF te'n zong singlamteh hiam, christian le laisiangtho symbol khat peuh hiam, zang ngei uh ahih le phiat themthum kei le uh hoihsa ing. Hibang teng ngaihsun kawm a, WZC flag kibawl ciang, singlamteh kician mahmah a kisuaksak ahihi.''

Openzosuan:  ''Party (Politic) cih system ah, khat in a khat gensia aa vote zong in a zol aa ki mu, NGO dan system tawh kawlgam hun luanzia ah muibun in mazang zaw ding aci ki om, hih tung ah bang na gen nuam aa?''

Pu Zokhup:  ''Tu a nong dot pen Burma political system thu hilo in, Burma ah tulaitak in, political party min tawh na i sep sangin, NGO min tawh nasem leng muibun zaw in teh kici, cihna tawh kisai zaw in um ing. Political party tawh nasem cih ciang in, NLD le ZNC party tepawl nasem pen, sikciangkhut kiukna pan, suahtakna ngah nang ngimna tawh nasem uh ahihi. ZNC le NLD tepawl pen, tu le tu banah khang sawnsawnte tan a, i khangto na ding, nasem uh ahihi. Den a i gen mah banga khanto na daal, dictatorship zunglawhsawm uh ahihi.Dictatorship zunglawh a, democracy a om ciang bek a, khantona taktak om thei pan ahihi. leitung gamte enleng i mu ding ahihi.

NGO nasem leuleu pen tu le tu kiallap vai zawdeuh ahiihi. Kial tu'nna ah nektawm ding hawmpak, puultu'nna ah zatui zaha hawmpak le amau target field tuam a ding nasemna tamzaw ahihi. Gentehna in, Nattun khawsik malaria vei khat pain relief zatui khat peuh pia a, ana phatuam sak pakna pen, NGO nasemna tawh kibangin, adamsiang theih nang Quinine i piak pen, ZNC le NLD te nasemna tawh teh theih ahihi. Quinine nawhzon mahmah a, malaria veipa piapah lo a, aphatuam pak nang pain relief bekbek i piakpiak le, cina si khongkhong ding ahihi. A si kei zongin, akhuak ah lungno lut in hai vak ding ahihi. Tu'n zong gamkim gamkiang ah, Zomi le Burmaami tampi kihaivak ta ahihi.''

Openzosuan:  ''Ukarine aa parliament ah amakai te uh thatang takpi tawh kitangh lai ngei dan hi mate. Sunday sim in WZC meeting na neih na vuah ae kitot/kiseelna cih khawng a om ngei hia?''

Pu Zokhup: ''WZC meeting ah kitot kiselna bel om thei zel mah ee, Agenda khat peuh a serious le kinialna bang om in, khat veivei vote tawh khensat hun bang om hi. Ukraine parliament daan liang a, kilai bel omsam kei. Atlantic, Pacific le Indian Ocean cih bang,..Ocean simin kigamla in, missile bang tawh kikap ding ih hih kei leh kikhoih khak ding baih kei, akinai pen zong mile 500 bang kigamla ka hih uh teh maw.

Openzosuan:  '' I Holim tawpna lam dingin Mipite tungah zotna kamkhat, Hanthawtna kamkhat leh nong gennop khat (a gawm in 3) atom kimin nong gen thei dia?''

Pu Zokhup:  ''Atawpna ah Zomi le Zogam suahtak nang, alunggulh Zomi akuamapeuh, mittawte mittaw, khelbaite khelbai tawh,na omomna, na hihna bangbang ciat uh tawh, WZC in malakhawm ding in hong muak den hi ung cih gennuam ing. Lungdam.'

 

Ref: Zokhup's Blog

Posted by: Tongsan Media Group

Comments/Ngaihsutnate (0)add comment

Write comment/Na ngaihsutna gelh in
smaller | bigger
password
 

busy

TONGSAN Video

TONGSAN Photo Gallery

TONGSAN Weekly Journal

Who's Online

We have 310 guests online
Joomla Templates and Joomla Extensions by ZooTemplate.com