zomi aw lung lau ken!

ARTICLES Interview Col. Khen Za Moong tawh Holimna
BLUE GREY RED

Col. Khen Za Moong tawh Holimna

PDFPrintE-mail

Col. Moong
 
CW : Colonel pa na suah ni, pianna mun, nu le pate minte nong gen thei diam?
Col : 1924 kum May 27 ni in Tedim gam huam Muizawl khua ah suak ing. Ka pa Thong Za Khai le kanu Lian Kho Niangte ahi uh hi. Unau 11 pha in kei pen unau pasal lakah a lianpen ka hi a, ka tungah u numei guk om in kei a sagihna ka hi hi.

CW : Na neulai thu tom kim cingin hehpihna tawh nong gen diam Colonel pa.?

Col : Ka neulai in ka pa pen galkap bu khat ahih manin, khua khit kua khatah kituah/ lal kawikawi ung. Maymyo ah zong teng ngei in, Malaysia nangawn ah teng ngei ing. Ka naulai in nuntakna bel nuamsa mahmah ing. Ka u te numei vive ahih manin tua hun lai takin laisin ding kiphal loin ko Unau sungah kei bek mah sang hong kikahsak hi. High School ciang ka kah khit ciangin Japan gal hong tun in galkkap ka tum a, pilna sinna hih ciang tawh ka khawl suak hi.

CW : Colonel pa aw, na neulai Zogam thute le Tedim, Falam, Hakha le Kawlpi khua thu cihte tawh kisai tulai Khangnote in thutheihna (Knowlege) angah na dingin nong genthei diam?

Col : A tung a kong gensa mah bangin ka pa galkap bu khat ahih manin mun tuamtuam ah teng kawikawi in, Zogam ah ka tannga le tanguk sung teng bek om kha suak ing. Tedim thu bel hoih takin thei ingin, Falam pen ken zong Zo khuapi cih ciang bekin thei ing. Tua hun lai in Zogam ah District (4) omin om tuate pen; Kanpetlet district, Haka district, Falam district le Tedim district te ahi hi. Paletwa pen Mangkang ten Rakhine gam sungah koih uh hi.

Zogam ah Mangkang te koih Palik (police) tawm khat le Zomi kumpi nasem pawl khat bek om hi. Tua District 4 te pen Mangkang Vuandok (Assistant Superindentent) 4 in uk pah uh hi. District khempeuh pen Falam khuapi a tu Mangkang VuandokMyingyi (Deputy Commissioner) khat in uk hi. Tua hun lai in Kawlpi pen Zogam sungah lah kihel lo, Kawlgam sungah lah kihel loin om hi. Kician takin bel thei cian lian keng.

CW : Colonel pa aw ,, bang kumin galkap lut a, bang hang teng tawh alut na hia cihte tawm nong gen diam?
Col : Kawlgam ah Japan te hong lut ciangin Augsut 1, 1942 ni-in Chin levies ah galkap ka lut hi. A hih hangin Japan galte tawh kikap kha lo hi ing. Tua hun laitak in Mangkang te hong phuat sak / hong piak min pen Chin Levies kici a, Japan te hong tung ahih man in India gam Manipur ah kihemkhia kha nei lai hi ung.

CW : Zomi sungah nang sim loh Colonel dang  bangzah om dinga, a mau mimal ciaptehna (Personal number) cihte nong gen theih om diam?

Col : Japan hunlai pekin lut khit ta ka hih manin ka Personal number pen Mangkang te hong piak nambat hi. ABRO Commission nambat kici hi. Suahtakna ngah khit ciang nambat kilaih leuleu hi. Ka nambat pen B.C 5007 hi. Tedimte bekbek atuam in galkap kiphuan in Chin Levies kici hi. Falam, Haka district te ah zong Mangkang ten tua bang mahin phuat sak hi.

CW : Galpi khatna (First World War ) lai in Zomi tulthum val Europe ah kipaisak cih kiza ngei ahih manin, galpi khatna thu na theih zahzah nong genthei diam?
Col : Galpi khatna lai in suak nai lo ka hih manin, tampi thei tuan keng. Ka theih sunsun hong gen leng ai ve maw. Ka pa Mangkang te sawlna tawh Tedim khua kimah mi tulkhat gal sungah van pua dingin kaikhawmsak in hi. Tuate pen mikang pau in Labour Corps zong ki ci hi. Ka pa pen Labour Corps makai hipah a, Mangpau /kam phen zong semin,ama makaihna tawh Pyintit (France) ah pai uh hi.

Falam le Haka pan mi tul khat ta mah pai maw/ lo cih kician tak in thei kha keng. Mangkang ten bel mi tulkhat ta van pua dingin  sam uh cih bel thei ing. Ka pa'n koi ci bangin mangpau thei hiam cih theih pih keng. Pyintit paite lakah upmawh loh pi a thau in akhakte le kamsiana tawh nattun vei in asite lo buang a vekpi in Mangkang ten ciah kik sakin, a khua atui ciat mahah tung kik uh hi.

CW : Zomi leh Pinlong Treaty tawh kisai khang thakte a dingin na thei zah , na ciap teh zah thuman deih na in hong gen ve
Col : Pinlong Conference bel kah keng. A masa Pinlong Conference pen1946 khawng hi in,Conference kah ding a pai Pa Pum Za Mang te group tawh Mandalay ah kituak kha ing. A nihna Pinlong Conference ah bel Pu Pum Za Mang hi nawn loin Ukpi Pu Thawng Za Khup
te group tawh lampi ah kituak kha lai ing. Kei pen Battalion sungah ka om tam zaw hi.

Pinlong Conference pen ei Zomi te ading in hoih mahmah hi. General Aung San in Kawlte tawh avot alum thuak khawm dingin Zomi te hong sap ai ve. Union i cih pen gam neu ( State tuamtuam te akigawmkhawm gam lian khat cihna ahi hi. Zogam ,Shan gam , Kawlgam, Kachin gamte kigawm khawm Union cihna ai ve. A Ngimna bel nak hoih lua.

CW : 1948 Falam People's Conference ah na kah kha hia? Democracy le Chin National Day hong piankhiatna dingin a thupi mahmah Falam Conference tawh kisai bangci muhna hia?
Col : Falam Conference kibawl lai takin Maymyo ah om ing. A hih hang tua hun lai tadinsa le Chin Division Document te pan Falam Conference ah People's delegate tulnga bang kah cih thei ing. Main Land Government pan hong pai Kawl delegate ka thei zah ci leng President Sat Shwe Taih nangawn Falam hong pai cih thei ing. Tua teh Paletwa pan zong delegate te zong hong pai hi. A maute Rakhine te hi lo uh hi.

Eite tawh minam kibang sikhat sakhat, u le nau sang gamte mah hi hang ci-in Falam khawmpi ah hong gen uh hi cih thei kha ing. Falam Conference lai in Ka pa nau ka pano Captain Mang Tung Nung le Takhin Vuam Tu Maung ten makai uh hi. Tua Falam khawmpi pen mipite deihna mantak a lakkhia zo Chin Conference hi ci-in mu ing.

CW : Tua hun lai in Sawbua pawl khatin Falam Conference thu kim pih lo in za ing. Chin Affairs Minister U Za He Lian i nau in Falam Conference pen mite gen bang in delegate tulnga a kahna Conference hi lo hi, delegate zanga khawng bek a kahna
Conference hi ci-in gen kici ahih manin tua thu pen koici dan ahia?
Col : Delegate tulnga cih pen kei gen hi loin, kei zong Falam ah om kha lo hi ing. Ahih hangin tadinsa te, Chin Division document te , a va kah ngiat delegate ka lawmte tung pan kamdawn in ka zaksawn kik hi. Tulnga le zanga bel kikhai sa lua liang ing. Tulthum tulli bang kah ci leh kikhai khollo hi.

Tua hun lai in Sawbua te ,Uk pi ten Falam Conference man' khit teh sum tul tampi ,Then tampi cih bangin amau tawh kituak in Liau na ngah uh hi. A mau Sawbua sem suak ding ci leh zong sum tua zah mu zo lo ding uh hi. Zomite zong a siah piak uh zang pah ai ve. Kei zong ka pu ka pate Ukpi nam ahi hi. Tedim gam a minam liante mah cih ding hi. A hih hang ken Falam Conference thukimpih mahmah ing. Tua pen Democracy diktak tak ai ve.

CW : Zogam ah tua hun lai a tualgal kici Chin Armed Forces a makaite min nong gen thei diam? Tua laitak in nang koi lai Armed Forces ah bangza (Rank) tawh panmun nasem na hia?
Col : Chin Armed Forces 1, pen Falam le Haka mite kigawm khawm uh hi. Commander pen Lieutenant Colonel Haran Tiyo le Deputy Commander pen Major PhuKong a kici Kawl-Zo (Haka) hi. Chin Armed Forces 2,pen Tedim mite tawh kiphuah hi. Commander pen Colonel Dal Za Kam hi in deputy commander pen Major Tual Khup hi.

Chin Armed Forces 3, pen Zomi vekpi kigawm hi. Commander bel ciamteh nawn keng. Tua banah Chin Commander le makai lamte kilaih pahpah hi. Haran Tiyo bekin semto suak hi. Chin Armed Forces (4) pen Chin Armed Forces (3) mah bangin Zomi vive kigawm khawm hi. A hih hang (3) le (4) ah a tamzaw Tedim mite vive ahi hi. (4) sungah Tedim pan Sihzang le Falam pan Hualngo minam te ahi hi. Chin Battalion (2) galkap zumah thuvanpi sem ding hong suak ahih manin galkap zumah duty sem hi. A za bel Major hi.

CW : Tual gal sungah Chin Battalion te hih zawhna bang ciang dong cihte nong gen thei diam?
Col : Tual gal sung ahChin Battalion (1) le (2) in apha deuh in galdo uh hi. A dang Battalion 3 le 4 ten zong amau tunna khua ciatpan rebel te do uh hi. Chin Battalion te bek tham loin Kachin Battalion nih leh Burma infantry khatte in zong Insein battle ah gal do uh hi. Kayin revolutionist te tawh battle ah Chin Battalion 1 le 2 te pen officer le adang galkap a si le a liam Zomi zathum val pha hi. Tua hun lai-in Sergeant Taih Chuan in Aung San Suriya buah ngah hi. A dang khatin siha sura buah ngah hi. Officer le adang gal kap tuam tuam ten Tuyegaung matdanwin tazeih ngah uh hi. Chin Battalion Commander Haran Tiyo tual gal sungah si hi. Tuate en leng Insein Battle bang zahtak a nasia cih kimuthei hi.

CW : Tua bang a minam kim ciatin rebellion a hih lai takin bang hangin Zomi te Kawlte lamah pang mawk ahi hiam?
Col : Kawl te lamah a kipang hi loin Union tungah Ciampel lo i hih man ahi hi. Kayin ten ko Yangon la ta ding note ko lamah hong pang
un hong cih hangin kithudon loin Union Government lamah akipang tinten ahi hi.

CW : Tual gal sungah Colonel Haran Tiyo i role hong gen ve. U Nuh tawh relation vai zong ee. Tua banah Colonel Haran Tiyo na phawk na thu a om le hong gensawn kik dih aw za nuam lua hang.
Col : Colonel Haran Tiyo pen kei tawh kimeltheih mah mah ing. Kei sang post khatin lian zawin amah pen Lieutenant Colonel hi. Ka
Battalion uh a kibatloh hangin a kilawmta mahmah le ka lawmit mahmah khat ahi hi. A mah pen makai picing mahmah hi. Relation zong hoih mahmah in galhang mahmah hi. A mah zah a galhang ding tuni ciang dong mu nai keng. U Nu in a tanu tawh kitengsak ding cih thu kigenngei khat pen amah thukim in um lo hing. A mah pen pasal picing mahmah khat hi. Pawl kaiht siam, tukpeng siam, a ma khut nuai mite tungah thudik, a ma sih khit akipan in Chin Battalion sungah kilemlohna hong om pah hi.

Kei galkap zumah thuzekpi sem lai tak Major pan Lieutenant Colonel ah hong khang sakin Chin Battalion (1) ah Haran Tiyo zaluah dingin Military Headquarters in order hong pia hi. Battion 1 a military officer Major a ngah zawh asawt nai lo Van Kulh le Lieutenant Colonel Son Kho Pau le adang Haka galkap bu te ki pawl in HQs ah pai uh, kei zong tua laitak Colonel Kyaw Yaw tawh kimu dingin HQs ah tungin Van Kulh te group Colonel Kyaw Yaw zum sungah a lut cianin kei zong zui in lut ing. Colonel Kyaw Yaw mai ah  kei pen Battalion 1 commander ding kilawm kei-in, kei ka zi Kayin Christian te hi ci-in Brigadier General Kyaw Yaw mai ah Van Kulh group ten kankuat uh hi.

Chin Battalion 1 pen Haka le Falam mite tawh a kiphuan a hih hangin upmawh zahin kilem lo uh hi. Pu Haran Tiyo hun lai-in a lungkimlohnate uh a gen loh hangin amah asih khit teh kilemlohna nakpi takin hong kithei khia hi. Falam le Haka na ngawn a ki lem lo uh teh Tedim mi ahi kei pen Battalion commander ding in hong deih lo zaw kan kan lai uh hi. Kei tua lai tak in Major bek hi pan ing. Van Kul sang senior zaw ka hih bek tham loin post khatin lian zaw ing. Tua ciang in Van Kul pen a dang Battalion ah puak hi. Kei zong Battalion 1, commander dingin hong koih nawn lo hi. A gamla a tung Pho Kung pen Battalion 1 commander ding in koih in nawng kai na te veng sak hi. A hih hang kei Battalion 2 commander bel sem ing. Kawlte ngaihsutna man lo ai ve. Zomite vive ahih ciang akilem ding sa uh hi ven.

CW : Zomite kikal ah atawntung a kilemlohna thu nang koi ci muh na hia?
Col : A hoih bawl le ahoih aphi ki ngah ding in um ing. I gam zong en kikkik leng nidang ahoih/ ahoih lo bawl cih tun akimuthei ve le. tua ahih ciangin lungsim hong sak un . A hoih semsin ve. Tua hi leh a senpi ding ai ve.

CW : Socialist hun sung Chin State Chairman len in Chin State na ma kaih na Chin State a ding na hih sak a om leh hong gen ve.
Col : 1974 Pyitu Hluttaw representative State councilor ka suah ma 1972 pan 1974 dong Chin Division Security and Administration Chairman sem ngei ing. Pilna lamah a masa lam Parliament hun lai tawh et kak leng khantohna ding bawl sak ing. U Nay Win pen mi tampi ten hoih lo hi ci-in a gen hangin, ei Zomite tungah mihoih khat hi. Zogam ah lampi kizopna ding (transportation) hih theih zahin hong sepsak hi. A hih hang mi tampitawh nakisem khawm hi in ei State neuno khat ading nasepna baih lo hi.

CW : Zomite  phawksakna (warn), hanthotna, sepsak nopnate na nei hiam?
Col : I pu i pa ten Zogam mualtung gam atelna uh pen tua mun adeih man uh hi lo hi. Minam golte gal lau in akihephep kawm in Zogam mualtung gam atung uh ahi hi. A mau telna gam hoih lo hi. Kalay-Kabaw Valley ciangah kiptak in na om uh leh nak hoih mahmah kha dingin um ing. Kawl gam sung a State le Division sungah minam sit sit bek atenna Chin State bek om lai hi. Zomi bekbek adim alet a omna Chin State ah kipumkhatna om lo ding cih pen kilawm het lo hi. A dang State te ah minam dangte tawh kigawmin kitengkhawm in kipumkhat lo hi le zong kilawm zaw lai ding hi.

Chin State a om Zomi te khat le khat ki it ding , kipumkhat ding nakpi takin kisam pha mahmah hi. Ko Tedim lam pawl khatin Zomi cih pen adang i sanggam (Chin brother) te a dingin en leng hoih het lo hi. Ko ka neu lai un Zomi cih thu popular het lo hi. Ko leh ko eimi (Our people)kici hi ung. No lamah zong Falam ten Laimi na cici ve vua. Tua pen ko Tedimte ading in hoih lo hi. Bang bang hi ta leh kipumkhat sawm un. Chin people te a dim a let atenna ah Chin State i kipumkhat kei leh etlawm het lo ding hi.

Source: Chin World

Translated and Posted: Tongsan Media

Comments/Ngaihsutnate (0)add comment

Write comment/Na ngaihsutna gelh in
smaller | bigger
password
 

busy

TONGSAN Video

TONGSAN Photo Gallery

TONGSAN Weekly Journal

Who's Online

We have 157 guests online
Joomla Templates and Joomla Extensions by ZooTemplate.com