zomi aw lung lau ken!

ARTICLES Zokam Inn Lam Ciah Ciang I Lunggulh
BLUE GREY RED

Inn Lam Ciah Ciang I Lunggulh

PDFPrintE-mail

1401547 651504858205062 387754273 oHun sawtpi inn lam ciah loin mun dangah i om khiat ciangin i lungzuangin i mitkha ah inn lam kimu dandan hi. Cik ciangin i ciah thei tam ciin kilungngai a, kikhuadak in i lungsim vak kawikawi hi. I lawm leh gualte tawh i thangsiahna munte, i bawhlung suihna munte, i vakkhopna munte cih bangin i lungsim hong luah in i lung hong nehno sak thei hi. I lawmte tawh i sangkah khopna, i gancinna, i vasa vaina, i zawllenna cih bangin mihing hong kingaisak ding thu tampi hong om naunau hi. A tuateng mah leitungah mihingin i pian ciangin a thupi leh a manpha hi a, a tuateng mah a nuam hi in, a tuateng mah i nuntakpih leh i lawhtak himai hi. 
 
Ahi zongin, khatveivei inn lam zuanin ciahkhia thei dingin vai i neih ciangin i lungsim ah lawpna leh lametna, lungdamna leh nuamna hong dim hi. I lawm i gual tawh kimu kik dinga, i lawmte tawh kikhawl in i kimuhloh sunga thupiangte genkhawm in - nuam i sakte, nuamlo i sakte, lamdang i sakte, i tuahkhak thute kikum in zanmeng liangin hun nuam kizang ding ciin i lungngai khol hi. Ahi zongin, khatveivei ciangin i kimuh taktak ciang tua na banglo in i upmawh sangin i lunglutna, i deihna, i lawppih, i thupisak cihte na kidang kha man thei hi. Tua bang ciangin kikholh ding zah in kikhawl theilo in i hun nuam dinga i ngaihsut kholh teng a mawkna tawh bei ziau bangin i ngaihsun hi. I ki upmawhzah in nuamsa ding, gualnuam ding i kisakte zong a na tuaci khin lo hi. Nekzonna na kidanga, vaikuanna lampi na kika in, vaksuk vaktohna lamzikte na kidangte hi. 
 
Khua lam ah bel i lunggulh mahmah i nek i dawn luite ne kik ding cihte hi. Ankam tui hawp in voksa tui huan nek ding cih khawng kilunggulh hi. Bawngsa guh tui huan khawng ne in buhcim leh aksa cihte ne in a muinam kiduh hi. A tua bang ding i innkuan te in na vaihawm uh ahih manin inn lam ciah kik pahpah ding lawpna khangsak semsem hi. Gamsung pan ciingngek, tumngek, taaknal, guangek cih bangte lim ngaungau a, anzoteh leh maiteh meh cih khawng tui awm suk leng nak lim ngaungau hi. Gamdangah a kimu lo vive ahih manin hihte lim kisa in sathau helloh, sathau pa lo kiduh hamtang hi. Zomi te meh - a tui huan leh a hul huan mah lim ngaungau hi. Mang-an, Sen-an, Vai-an cihte sanga a limzaw tawntung Zo-an ahi hi!
 
Gamsung khawng pai dingin, mualtung khawng kah ding, luisung khawng vak in luidung khawngah aisa sawk, ngasa man cih bang hileh singkung lim didiai nuai ah tawldam hit-hiat a, dam man om ngaungau hi. Nisa nuai ah pai leng zong inn tun ciang inn sunga tuivot cim kiuhkeuh pen i dangtak khempeuh kamsak pah ahih manin i dawn kikkik nuam mai hi. Zogam huihkhi lah siangin a khuadakna mual leh guamte lah etlawm a, leitung a hoihna mun pan Zomite khuadak in gam kuam mualcin en thei ihih manin hong bawlpa hong itna lianlua ka sa hi. Hizah a itna cik ciangin kuamah in ngilh ngei kei ni maw, Zomi. 
 
Inn lam i tun ciang i hawhnopna tamin i vaknopna tam a, i hihnop tamin i hun in hong cinlo pahpah hi. I hihnop khempeuh a kihih khin man ngeilo ding leitungah i teen laitengin i hun tomno khat pen manpha thei pen leh a cihtaak lungnopna i ngahna dinga i zat ciat theihna dingin i hun neihte pilvang takin zang ni. Nang zong inn lam na ciah ciangin na ngaihsut tampi om inteh, kei ngaihsutna zong tampi hong om thei zel hi. Lungleng kei inla, lungdam zaw in. Lungmuang inla, lungnuam in. Tawldam inla, nuamtakin na hun zang in. Mikangte in zong "Inn mah nuam penpen hi" (There is no place like Home) na ci ngeungau sam uh hi. Zomi te zah mah a leitung kiuli a tuancil mikangte in zong inn mah nuam na sa uh ahih leh ei Zomi te zong inn mah nuam i sak ding mah hi. Inn mah nuam pen hi. There is no place like home. 
 
[Zomi Khangnote sim ding deihsakna tawh kong at hi]
 
By: Dr. Hau Za Cin
 
Comments/Ngaihsutnate (0)add comment

Write comment/Na ngaihsutna gelh in
smaller | bigger
password
 

busy

TONGSAN Video

TONGSAN Photo Gallery

TONGSAN Weekly Journal

Who's Online

We have 120 guests online
Joomla Templates and Joomla Extensions by ZooTemplate.com