zomi aw lung lau ken!

ARTICLES Zokam A Hoih Zaw Ngaihsutna
BLUE GREY RED

A Hoih Zaw Ngaihsutna

PDFPrintE-mail

10697381 4699586503132 18338557028296367 oKhatvei vasa kizuakna sai khat-ah vasa nam tampi bawm tuamtuam ah kikhum-in kizuak zihziah hi. Tua a kizuak vasate`n bawm sungpan suahtak theihtheih nading hanciam tek uhhi. Vasa pawlkhatte`n ka suahtak mateng ci-in a bawm pumphut uhhi. Ahi zongin siktawh khauhtak-in kibawl bawm a hih man-in liam gawpin si zaw uhhi. Vasa pawl khat leuleu lah, `sih ding veve a nuam thei penpen in omning` cih ngaihsutna tawh a pute` an piak zahzah khamtak-in nephial lel-in thau iueu, dawng thihthiah mahmah pah uh a, ithuai pahmawk a hih man-un mite`n lei masa lianlian uhhi. A kilei hangin buk dangkhat ah sih dong kikhum mah ongsuak lelhi.

Tua lakah kikhum vasa no khat inzong phatakin ngaihsut mahmah hi. Hih bawm thatang phut leng adangte dan mahin gim-le-tawl tawh kasih lawh dinghi. Ki lungnuam sak-in an kipia teng nek eueu lel ding lah thu kasa keihi, cih ngaihsut-in tua a kipan an bangbang kipia taleh ne nawn vetlo, a vasa bawm lah phu langlang se lohi. Ong om hithiat, dai khinkhian ahih manin a sawt pianteh a pu lungnuam nawnlo-in, hih vasa a cina hiam?, a liam hiam?, natna gil neihiam?, cih theinopna tawh a buk pan dawm takin lakhia khiankhian hi. Bawm pan a lakkhiat laitak-in tua vasa-in a tha neihkhempeuh tawh kitom khia vatin lenkhiat san ziauhi. Suakta kik hi.

Hih vasa pen tuhun kampau in lo lehang critical thinking a nei mahmah vasa a hihi. Pilna tawh a tha neihte sit khinkhian sehi. Tu hun gam makai, minam makai ah hih dan ngaihsun siam miciim tam pipi ih kisam hi. Critical thinking cih kammal mikim-in letkul lo-in ih theihsa hi. Deihna bul zaw-in en lehang thinking outside of the box cihna hi-in, a ki ciangtan, a kikhak, huang, ngeina lui, zia-le-tong, dante pailet, khengkhia-in ngaihsut theihna, cihna ahihi. Kuama phawkkhak loh, ngaihsut khakloh, muh kholhloh lampi hoih, geelna hoih a nei giahgiah theite pawl cihna a hihi. Midangte ngaihsutna tawh kibanglo den ding cih ciang hilo-in a dangte phawkkhak loh ngaihsutna dangte sang hoihzaw neihna cihna ahihi.

Myanmar gamsung ka zin khak sunsunna munte-ah mi tampi tak-in critical thinking cihtawh kisai hita leh, ngaihsut theihna, thugil theihcianna tawh kisai-in, tuhun khangnote hawmthawh mahmah uh a, pawlkhat in lah mipi bup ngiatin thu theilo ki hailua hi, cih bangin kiphun ziahziah hi. Tua bang kazak teh ka lungsim sungah tua thu taktak meel theilo, a hi milmel na cih uhte midang hilo-in nang-le-kei ih hipah lelhi, ka cisim gige denhi. Kei mahmah a kipan ih gamah critical thinking zangin thugenna, thu khensatna lamah kinang mahmah hi. Gambup sang pilna (education system) ki mawhsak mun pen a, ahi zongin tua zah khatmah-in ei ngiat zong khuak zang nuamlo, laisim zolo, laisim hatlo ih hih hang na hilel hi.

Tukum, 2015 kum, pen Myanmar gam suahtakna ngah nading a a makai General Aung San suahzawh kum 100 cinkum hi-in ama thu kilim gen mahmah hi. Tua hun laitak General Aung San ka zahtak mahmah san thu khat-in a ma neih critical thinking a hihi. Kum 30 khawngbek pha pan khangmoi khat hilel, Political Science cih khawng a kah kha man tadih lah hilo na pin ki-ukna tawh kisai ama pom thugilte (political philosophy) te na khauhpai mahmah khin mawkhi. Ahang kanle hang thudang hi masa lo-in laisim na hat tuak mahmah a, anne manlo liangin lai nasimsim hi.

Tua hih man-in critical thinking cih na neipahhi. Thugil napom, thuthuk na mu, thuman khauhtak-in na dinpih a khangmoi mahmah tase leh mipi bup na makaih zohi. General Aung San danin a zahtak huai mahmah Philippines te gam makai Jose Rizal zong gam suahtakna ngah nading mapanna tawh kum 35 a phakteh ki thatlum khat a hihi. Tu dongmah ama thu Philipines gambup hita leh gam tuamtuam ah ama makaih ziate kisin, kikan mahmah hi. Jose Rizal zong laisim a uk mahmah, laipil, laisiam, laigelh siam khat na hi-in kum tawm lai mah tase leh a mipih te makaih zo khat suak hi.

India te makai Mahatma Gandhi-in a sih madeuh a gen thute lakah, leitung ah mi a nawngkai sak, siatna piangsak thu 7 cih na gen a, tuate lakah `Dinpih thugil neilo politic` (Politic without Principle) cihzong thukhat-in na helhi. Politic bek ah hilo-in milipte` nisim nuntakna-ah dinpih thugil, ngaihsut ciantheihna khuak, ngaihsut hoih neihtheihna khuak kisam a, tuate neih theih nading-in a thu lam mahmah ih zawh masak ding kul limlim phot hi.

By: Pau Sian Lian (Tongsan Columnist, Japan)

Comments/Ngaihsutnate (0)add comment

Write comment/Na ngaihsutna gelh in
smaller | bigger
password
 

busy

TONGSAN Video

TONGSAN Photo Gallery

TONGSAN Weekly Journal

Who's Online

We have 50 guests online
Joomla Templates and Joomla Extensions by ZooTemplate.com