Tongsan Media pan Dahpihna Thupuak

Print

Share

Zogam, Tedim gam huam Thalmual khuami Kawlpi, Pinlong, Kuatthit veng ateeng Pu Zam Khan Thang @Zampu (Judo), (Kum-62), Naulak beh in kum nih sung bang lupna tung ngakin a omna pan January 20,2013 (7:00PM) hunin tawntung mun hong ciahsan ta cih kiza hi. A nusiat a zi, a ta atute akipan gam le nam ading mapanpih a dah akapte khempeuh tawh kibang in Tongsan Media Group pan Dahpihna i pulak hi. A luanghawm tawh a nunung pen hunbawlna pen Agape Mission Center te' makaihna tawh January 22,2013 nitak lamin Hantansakna nei ding cih kiza hi.

Pu Zam Khan Thang@ Zampu i luang hawm tungtang ah ZCD makaipi Pu Chin Sian Thang zong kihelthei bek tham loin, ZCD min tawh thugenna le Itna le zahtak piakna in Minsialna nei ding cih ZCD Information Department pan kizasawn hi. Tua banah abeisa Kum 24 sung tawntung Kawlpi ZNC ah aseppih hong nusia khinsa ahi; Pu Vungh Za Pau, Pu Khual Za Nang, Pu Thang Khua Tuan, Pu Do Pau te tawh ZNC lungtup matun nailo in, hong nusiatna pen Mipite supna lianpi khat ahi hi. A hih hangin Khangno Zovontawite in amaute maban a zomsuak dingin Pasian in Zomite hong makaih ta peuh hen.

Pu Zam Khan Thang pen Zampu (Judo) pen minam le Zolai ngiat a it mahmah khat ahih manin, Kawlpi pan kihawmkhia masa Zo Aw Weekly le Tongsan Weekly te ah a pilna, siamna le sum le paii tawh mapang den khat ahi hi. Tua banah Zomi Computer and Internet Association (ZOCIA)-Kalay Branch zongah Thudotpi (Advisor) in mapang cih ZOCIA website pan kizasawn hi. Pu Zam Khan Thang in tulaitak Sagaing Division sung ading ZCD (Patrons) panmun ah a husanna bei ni dong citak takin mapang Zomi Salpha khat kisumh ahih manin, Tongsan International Media Group (TIMG) pan zahtakna le Pahtawina i pia hi.
 
Dahna le Zahtakna tawh,
 
Tongsan International Media Group (TIMG)
Headquarters,
Zogam, Kawlpi
 
 
 
 
Joomla Templates and Joomla Extensions by ZooTemplate.com