Mizoram Tongsan Consultant Thupulakna

Print

Share


DSC00088 1024x768A 65 cinna Zomi Nam Ni (Zomi National Day 2013), Aizawl ah Tongsan Pen Award 2012- pahtawi piakna hunpi tawh hun i zatkhop theih manin, cidamna hong pia i biak Pasian le hun hong pia ZCSM makaite' tungah lungdamna lianpi kong puak masa hi. Zomite sungah Kawlgam lam ading Kawlpi khuapi pan Nipisim thukizakna " Tongsan Weekly Journal" in sim le maal Zomite ading laihawm kician khat ahi hi.

Pasian huhna le i lai le minam itna tawh nasem Tongsan tanute hanciamna tawh tu in, Tongsan International Media Group ci-in, Kawlgam sung bek hi nawn loin, leitung mun tuamtuam ah simtheih, ettheih dingin Online / Internet pan zong nasepna thupitak kinei ta hi. Tua hi a, Tongsan International Media Group i nasepna le hanciamnate mipi in kitelcian kim lo kha ding ahih manin, Tongsan tanute tangin anuai a bangin tomkim cing hong pulak ding hi ing. Kong pulakkhiat sunsunte zong Tongsan makaite' tawh kithuzaktuahna pan mahin kong leptuah kik ahi hi.

 Tongsan International Media Group i Ngim le Tup bulpite:

1. Zolai/ Zopau it in, puah le zuun ding.
2. Siim le maal Zomite sungah Zolai le Zopau vai ah zattang lai/ pau (Common) khat i neih zawhna ding.
3. Siim le Maal, suah le tuum Zosuante kizopna (Communication) a thahat semsemna ding.
4. Thukizaktuahna tungtawn in,m Zomite' sungah kimeltheihna le kihuh/ kipanpihtuahna akhan zawkna ding.
5. Zomite sungah biakna lam le namvai (Politics) thute ah kipumkhatna le sepkhopna akhan toh zawkna ding.
6. Tongsan Media tungtawn in Zomite' sungah Laisim hatna le thumuhna akhantohna ding.

Tongsan International Media Group Tangthu tomkim:

Zomite' khuapi khat mah ahi Kawlpi pansan in abeisa April 2002 kumin Zomi sungah Lai le minam a it makai 20 valte in " Zo Aw " ci-in Nipisim (Weekly Newsletter) pankhia uh a, Zomi khempeuh a huam Kalsim laihawm masa pen dingin kiciamteh hi. Kawlgam galkap kumpi' uk sung ahih manin, laihawm akipan suahtakna (Freedom) kici peuh mah om loin, asawtlo February 2006 kum ciangin Zo Aw- (Zomi) cih min le kipawlna (Committee) min limlim deihlohna hang tawh kikhawlsak hi.

Tua bang a kikhawlsak ciangin, amau deihloh Zomi min (Zo Aw) zang nawn loin, Kipawlna (Committee) zong zang nawn loin, mimal min tawh Sia Khampeek (Tongsan Pu) in Tongsan Media Group min tawh nasep zomto suak hi. Hih Tongsan Media Group cih min tawh Nipisim in " Tongsan Weekly Journal" kihawmkhia denin Zomite sungah laisim nopna le kimeltheihna tampi om hi.

Pasian huhna tawh laisim mite' panpihna tawh a kumkum in kithahat semsem in, Kawlgam sung ading Tongsan Weekly Journal bek hi loin, tuhun Media and Information hun ahihna tawh kiton in, Tongsan Official Website le Tongsan Group mail cihte dongah maban kikekto thei hi. Hih Tongsan Media Group tungtawn in leitungbup ah kithehthang Zomite in kimeltheihna le khuamuhna cihte akipan khantohna tampi kingahlawh cih zong kithei khia hi.

Tongsan International Consultants.

Tongsan International Media group i cih zahkhop in leitung gam tuamtuam ah naseppih le thukuppih kikoih kawikawi hi. Tua mite pen amau munmun ah Zomi makai lamte le mipite' theih zawdeuhte hi zaw deuh hi. Amaute in a pilna, siamna, neih le lam sitlo in mapang ngamte vive uh ahi hi. India gam adiakdiak Mizoram ading in Pa Hang Thawn Tuang (Pa Tuang) in abeisa 2010 kum akipan tuni Tongsan tawh minam ading mapanna nei thei hi. Hih bangin mapankhopna hang mah tawh Tongsan Media in manawt in lawhcinna kingah ahi hi.

Tua hi a, hih bangin mapankhopna le khantohnate hangin Tongsan tanute in zong thangahna le lawpna tampi kinei ahih manin, abeisa 2010 kum akipan Tongsan Pen Award leh Tongsan Reporters Award ci-in pahtawi piakna kineithei hi. Hih banga pahtawina sungah apahtawi huai taktakte mah Online pan mipi (Vote) kipiasak in kumsim kiteelkhia den ahih manin, Tongsan tawh mapang khawm mipite khempeuh tung zongah lungdamna lianpi kinei hi.

Tongsan Pen Award Winners:

1. Dr. Hau Za Cin    ( Tongsan Pen Award 2010- Winner)
2. Zomidaily.com     (Tongsan Pen Award 2011- Winner )
3. N.Pau Tun Thang( Tongsan Pen Award 2012- Winner)

Tongsan Reporters Award Winners:

1. Cin Sawm Tuang  ( Tongsan Reporters Award 2010 )
2. 2011 Award piak tham omlo (.....                                )
3. Peter Dai Suan Kham (Tongsan Reporters Award 2012)

Hih bangin siim le maal a om Zomite in Media tawh panlakna kinei thei ahihna mipite mahmah i theihpih ding deihna tawh cihtham hetlo ta le Tongsan Award kipia ahi hi. Tua banah adiakdiak in India, Manipur lam a om Zomite' sung zongah Media lam nasep lian ahi Zogam.com, Zogamonline.. cihte mah tawh mapang khawm vive ahi hi. Hih bangin i omna mun le gam ciat pan Media lam i thupitsak nak le Zomite pen namdangte' nuai ah ki om lo ding cih Tongsan Media i ngimna tupna zong ahi hi.

Lungdamkohna:

Bangbang ahi zongin tutung a Tongsan en Award 2012- lungkimhuai tak le etlawmtak a hong ngah N. Thangpi mahmah zong Tongsan International Media Group min tawh lungdampihna i pia hi. Tua banah tuni hunah hun manphat ngah theihna dingin Zomi Nam Ni piangsak Committee makai vaihawmte khempeuh tungah zong Tongsan Media Group aitang in lungdamna lianpi kinei hi. Mai lam i Zomi thukizakna Tongsan International Media group tawh mapang khawmto lai dingin Tongsan tanute khempeuh tangin kong zawn pha nuam hi. Zomi Nam Ni khansawt dam hen la, Zomi namte mahmah Topan thupha hong pia hen. Ka lungdam.

Note: Mizoram, Aizawl khuapi akinei " Tongsan Pen Award 2012 " piakna Zomi Nam Ni 2013 hunpi sungah Pa Hang Thawn Tuang ( Tongsan International Consultant of Aizawl, Mizoram) in mipi' maiah Tongsan Media nasepna tomkim le lungdamkoh thugenna anuai abang in hong kisuahkhia kik hi.


By: Pa Hang Thawn Tuang @ Pa Tuang ( Tongsan International Consultant of Mizoram)

Joomla Templates and Joomla Extensions by ZooTemplate.com