zomi aw lung lau ken!

NEWS Tongsan News CPP VUM LIAN, USDP LE 2010 PINGPEI KITEELNA
BLUE GREY RED

CPP VUM LIAN, USDP LE 2010 PINGPEI KITEELNA

PDFPrintE-mail

Tutung Zomi sungah 2010 galkap kiteelna tawh kisai kikupna tuamtuamte ah Pu Vum Lian min hong dawk kha zeuhzeuh ahih manin ka kan cian le 2010 ah amah ahih kei leh tanaute election ah lut sawm hih tuak hi. Theih cian bel hi kei in ahi zong tua thu kigente aman leh bel 2010 ah kihel ding cihna in la phot leng.CPP party min tawh din sawm cih thuthang om ahih ciang cihna ahihi.

2010 kiteelna a lut ding peuh mah in 2008 constitution pom cihna ahih manin SPDC kawlgalkap kumpi in zong pakta/ hua nawnlo ding,  ama a ding zong lau huai nawn khol lo  ding ahih manin, Pu Vum Lian tawh ki thuah khakna khen khat leh ka muh daan taklang nuam ka hihi.

Pu Vum Lian pen ka theih cilna Mandalay University katu'n pan ahihi. Mandalay Kawllak ah Zomi Hotel nei nih le thum bek om ahihi. Tua lak ah Pu Vum Lian kihel ahihi. Amah pen Degree ngah khat zong hi in khang thak sang naugpang tampi in model khat a a ki ngaihsun ahihi. Ni dangin Zomi BA IA te'n kumpi nasem in, innkuan a ding  khop  nuntakna mu ahih manin aki eng mahmah hi. Ahi zongin 1988 khit lam ciang kumpi nasem te'n khasum kham zo nawnlo in mun teng gamteng ah innkuan vak nang sum le pai zongin kidiang khia ngeingai ahihi. Mumang phaw'n vat mah bangin asi amang tawh nektawm zong muzo lo tampi ki om, ci leng kikhial lo ding hi.

Tua bang dinmun kawmkal ahih manin, Zomi pilna sin te'n zong kumpi nasem ut kua mah om nawn lo in sum bawl sum zonna lam ki ngim tek in, tu in agahte i muh bang ahihi. Pu Vum Lian pen tua hun kikhel cil lai a pilna nei sumbawl lawhcing khat ahih manin, Zomi Siamsinte model khat hi, ka cihna ahihi.

Amah pen Model khat bek zong hilo in Mandalay Siamsinte hong panpih mahmah khat ahihi. Zomi namni bawl ding ciang, Mandalay Zomi bup ah mawtaw nei kitawm mahmah kimkal ah ama mawtaw siamsin te'n akizang den ahihi. Minam dangte State day, minam ni khong ah motor vive hall pua ah bawk pekpak in, Zomi( Chin) bup in i bawl ciang bel Pu Vum Lian motor bek mah a kipei  ahihi. Tua nangawn amah thusiam hi lo hi leh  Hero cycle lui giapguap 30 khong bek kipei ding daan hih tuak hi. Mandalay ah bel amah lian tawh ki thuah khakna nei lo in Yangon ah bel kithuah kha ngei zek ka hihi.

Kum sawm tampi sung Mandalay Zomi Siamsin te'n magazine Zopau tawh aki bawl zawh nawn loh nung in, Zingsol magazine Zokam tawh bawl kik ding thathak san kikna ki nei in, experience bang mah neilo pi in kong kipan uh hi. galkapte kiang phalna kila toto in akingah ciang in Yangon mah ah nasep kei a leh hi thei lo ding din mun ah om ahih manin, Pu Vum Lian inn bulphuh in azawh tan ama inn ah kibawl ahihi.Abul patna pen Pu Sing Do Lian (Do Pi, Vangteh) ) te unau in 8000 asik uh ahihi.

Tua bang hun sungah Magazine suak dekta, sum hong kisam ahih manin Fund zo'n ka kipan uh hi. Mipi in themthem hong khia sam in, a ki cing ding bel kingah zo mahmah lo hi. Tua ciang Pu Vum Lian Mandalay pan hong paisuk in Yangon ah ama motor zangin inn lusi ah amah mimal mahmah in hong vak pih a leh, akicing dimdem ding kingah zo pan ahihi.

Victoria Hotel neipa mihau ci a,  kiho khak mengmeng ding zong a hamsa,  mi minthang khat , innkong bang ah hong dak a minam sum ding hong khawn, cih ciang mite'n zong it ngamlo in, hong pia zuahzuah uh ahihi.Kawlsum 200,000 val kingah in tua hun lai 1995-6 kim a ding in tawm hetlo ahihi.

Zingsol magazine tawh kibawl khawm Chin Magazine a ding 90,000 bek kingah zo in tua nangawn  maths Lecturer Mai May Khin (Asho, Taung Dwin Gyi)  i sik ahihi. Ka cih nopna ah  Pu Vum Lian maitang tawh Minambup kipawlna Chin magazine sangin Zingsol in fund tampi kimu zaw ka cihna ahihi.

Magazine vai zawh ciangin 1998 kum in Zomi Nam Ni golden jubilee bawl ding vai hong om in committe  kibawl a, Pu Thang Za Tuan pen chair hi in , kum dang tawh kibanglo in thupi tak a bawl ding ki thukim ciat ahihi. Tua ma 49 veina 1997 kum Zomi nam ni pen Kawlgalkap kumpi in akipat ma minute 15 kisap laitak galkap tampi tawh um in, hong phiat ahih manin mipi ki thang pai mahmah ahihi.

Tua ahih manin 50 ci'n Golden Jubilee pen mipite thangpaihna tawh kipang ahih manin, kilawp tek mahmah ahihi. Upate, khangno le sangnaupangte kigingsa in ki om ahihi. Judson Centre ah anunung pen meeting akibawl ciangin Mindat pan Unau Cho papi Major lui khat in" Nung kum 1997 bangin hong phal kei le uh bang cih ding?" cih dotna hoih mahmah khat hong bawl ciangin palai pai khem peuh in " Amau kawlte phal le phal loh tawh kisai lo bawl veve ding " ci in kigen zezua ahih manin tua ah thupukna kia ahihi.

Chin State Day ci a bawl kei lenglah zahdah uh, en lah National Day a bawlsawm ih hih ciang, ci in Alaung Phinyar Than Shwe, Whisky Maung Aye le minister teng sapna lai kikhak ahihi. Ahi zong akibawl ciang kua mah hong pailo/paingamlo in amai gual a tutna teng awng ahihi. Hong kham ngamlo in, district officer khenkhat hong sawl thelthal sam uh hi.Tua ni mah in ZNC te'n zong Fulai Restaurant ah Zomi Nam Ni bawl in Mualtunggam makaite leh kawl NLD makai lian teng in uap hi.

1998 Golden Jubilee Zomi Nam Ni  akibawl zawh,  azing ciang ahi February 21 khat ni a suak kawlgam Radio, TV le thuthang bute ah Zomi Nam Ni thupitakin kibawl, ci in limtak hong suak sak uh hi. Ahizong Myanmar Alin( The New Light of Myanmar) ah pen Chin State day ci in hongsuak sese mawk hi. Tua thu pen Mipi lungkimlo in phun le ciak tam mahmah ahih manin, committe makai tuamtuam ah a kigen hangin panlak ding daan lampi omlo hi.

Ahizongin kilumkim thei mahmah lo, kigengen ahih manin complaint bawl ding, cih  saunaupang le khangno khenkhat   ka ki thukim uh ahihi. Ahi zongin bang ci panlak ding cih among ki theilo a ka om laitak uh, Pu Vum Lian in hong kan khia in, Kawlgam news khempeuh a control pen Myanmar News Agency- MNA hi in tua ah va complain kul hi, vapai ni, ci in hong gen ciangin ki thukim pah hi.

Ni khat February 23-4 koizaw hiam tel non keng MNA ah Pu Vum Lian makaih in khangno 15 khong kava kuan uh hi. MNA news a alian khat in hong lengla do hi, " Bang ci mawk a National Day kimlai State Day a hong suaksak mawk na hi uh hiam ? " ci a aki dot ciangin tua kawlpa lau tuak in hong enlaplap in " Tungsiah thupiak hanga State Day a hong suaksak ka hi uh" ci in hong dawk kik hi.

Tua ciangin khangno teng in amau tungsiah galkap te'n thaulong tawh thupia mawh uh ahih leh nial ngam lo uh hisam in teh, ci a kidai dide laitak in, Pu Vum Lian in " Ahih leh tungsiah thupiak ahih leh MRTV le Kyemon in bang hang suaksak uh hiam ? " ci a guhtak a hong dot suk a leh, tua kawl ulian pa amai hong eng in " Hi khamah in teh ahizong MNA pen kawlgam bup news teng kumpi tanga  edit pawl hi in, Myanmah Alin pen MNA in direct a kalet uh ahih manin tua ah suak sak theilo ka hi uh hi, kumpi policy kazuih uh kul hi." ci in hong dawng kik hi.

Tua khit ciang in kiciakciak lai ahih manin tua kawlpa in " Ko zong Minam Ni a hong suahsak sawm mah ka hi uh hi, na up kei uh leh , en un " ci in Minam Ni ci a layout agualhsa  teng uh  abanban in hong lak hi. Zong asuah sawm takpi sa uh  na hihi. Tua khit ciang in Kawlpa in " Tungsiah thupiak honglut vat ahih manin hong theisiam un" hong ci ngeungau hi.

Khangnote zong ki lungkim tuannai lo ki ciah kik nuamlo in ki ding niloh a  hih manin Pu Vum Lian in" Tua ahih leh tungsiah na cih pen kua hiam? koi level pan hiam?" ci a  hong khei khiat  a leh, kawlpa zong acih nang thei nawnlo ahihmanin " Tungsiah ka cih pen department level kacihna hilo in, State level asang pen pan ka cihna hi" hong ci khia hi. " Kumpi nacihna maw" a kicih ciangin " Himah hi"  ci in hong dawng ta hi.

Tua ciangin hih thu pen mikhel khat peuh hiam, department khel khat peuh hiam  i bawl hilo in Kumpi kici, asangpen a tute lungsim taktak hi, cih ki confirm khia  thei ta ahih manin, akuan teng lungkim tak in MNA office ka nusia  uh ahihi.

Zomi Nam Ni le MNA vai tawh kithuah khak khit teh amah tawh kithuah khak na tam nawnlo hi.Ahi zongin Zomi te zong Gamnuai Party neih ding sawt pek pan hoih kisa in gen khawmna omtoto a 1998 kim lam ciang min mahmah ta ahihi. Tua tawh kiton in khat vei Pu Vum Lian tawh mimal a kihona ah ka hem gen a leh " Ken bel na gengen uh sang semsuk le uh cin hoih sa zaw ing" hong ci hi.

Gen kizom lo in Pu Zozam in zong hi thu tawh kisai  hem theih  ahih manin khat vei ka tut khawm na khat vuah " Zomi te "ding" ding hileng, tulai ahun hoih pen ahi" hong ci ngei hi. Anunglam ciang Pu Vum Lian in gam le nam tang a, na ding taktak ding uh leh" Uniform 20 ken hong si pah ning " ci in kam ciam hong piak beh hi.

Hihte pen tuhun ciang thusel ( secret ) hi nawnlo ahih manin kong pulak khiat ahihi.Pu Vum Lian le Pu Zozamte in  SPDC deihna 2010 kiteelna ah kimaih sawm ta uh ahih manin, amau a ding zong lau huai nawnlo hi,  tua cih thadah kawl  kumpi nuam zawsop ta ding ahih mana kong gelh khiat ahihi.

Ka thu khupnopna ah hi banga gam le nam a ding, dawi havang kawmkal ah sem ngam, mat le hen tuah theihna kawm kal a, minam din pih ten 2010 kiteelna i lut sawm pen ngaklah baih lua i hi diam , ka ci nuam hi.

USDA pen USDP suah in Cheeboo  Thein Sein in makaih ding cih hong puang sawn sawn ciang  CPP le CNP makai Pu Vum Lian le  Pu Zozam te hong kingaihsun le uh  deih huai ahihi. USDP pian ma bel sungluh ding, cih ahih theih hangin, tu'n USDP in seat teng liak mai sawm ahih manin, boycott lam hoh hong vai hawm le uh  a hoih zaw tammaw ci simsim ing.

Bang teng hi leh mimal freedom ih zat ciat ding ahih tawh kiton in, i om na ciat ah sep zawh zah sep ciat ding bel a thupi mah bel hilel sam ahi, ci in thukong  ka khum ahihi. (Src: Zo Khup)

Comments/Ngaihsutnate (1)add comment
...
written by Kai Mang , August 25, 2015

Lawm aw hih na lai aat kong thuh ma in ki kup nop tam pi om a hih man na min leh na khua nong thei sak thei dia?
report abuse
vote down
vote up

Votes: +0


Write comment/Na ngaihsutna gelh in
smaller | bigger
password
 

busy

TONGSAN Video

TONGSAN Photo Gallery

TONGSAN Weekly Journal

Who's Online

We have 65 guests online
Joomla Templates and Joomla Extensions by ZooTemplate.com