zomi aw lung lau ken!

NEWS Burmese News RC Biakna Kum 500 Jubilee Pawipi
BLUE GREY RED

RC Biakna Kum 500 Jubilee Pawipi

PDFPrintE-mail

1527107 529409530490330 537405735 nKawlgam ah Catholic Biakna a tun zawh kum 500 cinna pawipi nithum November 21-23,2014 sung a kibawl laitak ahi hi. Hih pawipi asiim dingin Kawlgam sung mun tuamtuam panin Catholic thuzuimi tul tampi Yangon khuapi tung ziahziah uh hi. Pawipi honni in St. Mary’s Cathedral biak innpi sungah Pope Francis tang a hong pai Cardinal Oswald Gracias (Archbishop of Mumbai) in Kawlgam Catholic thuzuimi pawi sim khempeuh tungah Itna thu leh Thuhoih tampi genkhia hi. “Tuni pen ih lungdam ni bek hi lo in mailam ah Laisiangtho tawh kizui in bangci kalsuan khop dinga Kawlgam mipite phattuamna ding bangci bangin nasem khawm ding ih hiam cih thu zong ih lungngaih khop hun a hihi” cih thu tawh pawipi hon thugenna Cardinal Oswald Gracias in nei hi.

 

Yangon khuapi sunga om Archbishop Charles Bo  in muakna thu a genna ah “Haksatna tampi kawmkal ah thuakzawhna hang tawh hiciang a kitung ahihman in kilungdam pha diak hi” ci hi. “Zawnna leh simmawh bawlsiatna bek hilo Sihna dongin Catholic thuzuimi te’n thuak mah taleh amau Upna panin puapial khia lo in kip takin tuni ciang dong ding tinten uh hi. Kahna leh dahna khituite in pawlpi sungah Upna kip sak semsem a, a luangkhia sisante in Kawlgam sung mun tuamtuam om Catholic mimal kim unau innkuan khat hong suak sak a, kizopna picing sak semsem hi” cih thu zong gen Archbishop Charles Bo  in gen hi.

 

“Bhuddha biakna gam ahi  Kawlgam ah Christian pen kitawm mahmah hi. Tukum Census kibawlna panin Kawlgam bup mipi phazah pen 50 Million val kipha a, tua lakah Catholic thuzuimi pen 750,000 khawng bek kipha hi. Gaeneral Ne Win in Kawlgam bup a ukcip a kipan Socialism lamzuan in hong kalsuan pih in, gamdang pan a Kawlgam ah Pasian na hong sem Missionaries khempeuh phial kihawl khia in Kawlgam pen leitung gamdangte tawh kizopna om thei vet lo zah dong ciang hong ukcip himah ta se leh Catholic Pawlpi pen khang veve hi. Tu in Pasian hehpihna tawh Kawlgam in gam dangte ah Phungzi leh Pasian nasem dinga kipumpiak nungaksiangtho leh tangvalsiangtho tampi tak sawl khia ta hi” ciin Archbishop Charles Bo in ucananews.com te thudotna dawng hi.

 

“Kawlgam kumpi in 2011 kum in gamsung ki ukna puahpha ding cih thu a genkhiat akipan Kawlgam ah Religious Orders (Catholic sunga Pasian nasem phungzi leh tangvalsiangtho nungaksiangtho te kipawlna) tampi hong khang pah hi. Hih khantohna hangin tu in Kawlgam sungah phungzi suak dingin a kipia khia tangvalsiangtho 300 val om uh hi. Kum dang tawh teh in Kawlgam ah Pawlpi pen khanpi mah in khang hi” cih thu zong gen beh lai hi. Tua banah  “Kawlgam pen a khangto dinga kipan gam ahihmah bangin khuaneu 10 pan 20  cih bang kipawl khawm in Pawlpi sungah hong lut ziahziah ta uh hi. Khua hausa te’n khensat peuh le uh mipi in zui pah lel uh hi” ci hi. Tua teng khit ciangin  Archbishop Bo in “Maikum lamah Pope Francis  zong Kawlgam ah pai ding hong vaihawm leh ut mahmah ingh” ci hi. Tukum World Youth Day a kibawlna South Korea ah Pope Francis zong kihel thei a, Sri Lanka leh Phillipine ah zong maikum January kha sungin va hawh ding hi.

 

Kawlgam sungah hun thupi ahi Democracy lampi maan zui dinga mipi a kithawi lihlih laitak leh Catholic thuzuimi te hun thupi pen kituak sese hi. Kawlgam Catholic Bishops te kipawlna sunga Excecutive Secretary a sem Fr. Maurice Nyunt Wai  in a genna ah “Kawlgam aa dinga hun thupi leh kikheelna hun sungah Catholic Pawlpi in zong sep ding masuan tampi nei hi” ci hi. ucananews.com te kiang a genna ah “Kawlgam kilamthakna hun sungah kilemna a om theihna dingin Pawlpi zong kihel ding hi. Pawlpi pen Aw nei lote Aw hi dinga,  akipaampaih mipite kip takin dinpih ngiat tawntung ding hi” ci hi.  Hih pawipi sungah a kihel ngiat dingin Kachin State pek panin mi 4000 val kihel uh hi. US President Barrack Obama hong pai khit cianga Kachin te tunga Kawlggam gaalkapte gamtatna zong Pawlpi in theih pih hi. Kachin mite aa ding Catholic Pawlpi in phattuamna tampi sem toto lai ding hi. Pawipi khakna hun pen Sunday ni November 23,2014 ciangin Yangon Football Stadium ah Papal Nuncio Tito Yllana (Phillipines) tawh kibawl ding hi.

 

Source: UCAN News

Translated by: Lamthang (Zomi Quadavis)

 

10626303 10203786574277956 6841809459839852386 o

 

10448518 10203786157507537 8317625632522322637 o

 

10379779 10203786582878171 1769565880953464963 o

 

10818291 10203786582278156 5587675468985553776 o

 

TONGSAN Video

TONGSAN Photo Gallery

TONGSAN Weekly Journal

Who's Online

We have 75 guests online
Joomla Templates and Joomla Extensions by ZooTemplate.com